Türkmen halkynyň gadymdan gelýän hoşniýetlilik, parahatsöýüjilik, ynsanperwerlik häsiýetleri we däpleri döwletlerimiziň oňyn Bitaraplyga esaslanýan daşary syýasatynyň özeni bolup durýar. Berkarar döwletiň bagtyýarlyk döwründe türkmen Bitaraplygy sebitde we dünýäde syýasy durnuklylygy üpjün etmegiň hem-de milli bähbitleri goramagyň, durnukly gatnaşyklary ýola goýmagyň möhüm girewidir.
Hemişelik Bitaraplyk derejesine we «Açyk gapylar» ýörelgesine esaslanýan döwletimiz üçin Birleşen Milletler Guramasy halkara gatnaşyklary kadalaşdyrmagyň we ösdürmegiň strategik binýady bolup çykyş edýär. Birleşen Milletler Guramasynyň Baş Assambleýasynyň 73-nji mejlisinde ähli agza döwletler tarapyndan Türkmenistanyň öňe süren «2021-nji ýyl — Halkara parahatçylyk we ynanyşmak ýyly» atly Kararnamanyň biragyzdan kabul edilmegi hormatly Prezidentimiziň başlangyçlarynyň ählisiniň dünýä möçberde ägirt uly gyzyklanma döredýändiginiň subutnamasydyr.
Parahatçylyk we ynanyşmak adamzat üçin iň zerur düşünjelerdir, häzirki wagtda biri-biri bilen aýrylmaz baglanyşykly bu ýörelgeler hyzmatdaşlygyň we ösüşiň baş şertine öwrülýär. Parahatçylyk dörediji sebit merkezi bolan Diýarymyz dünýäde ösüş arkaly parahatçylygyň ýola goýulmagynda, sebitde durnuklylygy üpjün etmekde, bu ugurda öňde goýlan maksatlara ýetmekde yzygiderli we maksada okgunly işleri durmuşa geçirýär. 2021-nji ýylyň awgust aýynda Hazaryň türkmen kenarynda geçirilen 6 sany iri halkara çäreler munuň aýdyň mysalydyr. Ýagny Merkezi Aziýa döwletleriniň Baştutanlarynyň Konsultatiw duşuşygynyň, Ykdysady forumynyň, Merkezi Aziýa döwletleriniň Zenanlarynyň dialogynyň birinji forumynyň, halkara sergisiniň, Merkezi Aziýa döwletleriniň tagamlarynyň sergisiniň hem-de Merkezi Aziýa döwletleriniň medeniýet we sungat ussatlarynyň baýramçylyk konsertiniň geçirilmegi Türkmenistanyň Merkezi Aziýada halkara maslahatlaryň geçirilýän ýurdy hökmünde eýeleýän ornunyň barha pugtalanýandygyny görkezýär.
Ýaňy-ýakynda paýtagtymyzda Ykdysady Hyzmatdaşlyk Guramasynyň XV sammitiniň üstünlikli geçirilmegi Diýarymyzyň köptaraplaýyn we ikitaraplaýyn hyzmatdaşlygy ösdürmekde, parahatçylyk döretmeklik medeniýetini dünýä ýaýmakda dünýä nusgalyk işleri amala aşyrýandygyny görkezýär.
Täçnabat PAÝTYKOWA,
Türkmenistanyň DIM-niň Halkara gatnaşyklary
institutynyň uly mugallymy.
