«Bir millet –– iki döwletiň» — Türkmenistan bilen Türkiýe Respublikasynyň arasyndaky gatnaşyklar müňýyllyklaryň jümmüşinden gözbaş alýar. Häzirki wagtda bu gatnaşyklar yzygiderli işjeňleşdirilýär, ösdürilýär, kämilleşdirilýär. Munuň netijesinde bolsa iki ýurduň dost-doganlyk köprüsi has-da berkemek bilen, iki halkyň arasyndaky medeni-ynsanperwer, söwda-ykdysady, energetika, ulag-üstaşyr ulgamlarda hyzmatdaşlyk ýylsaýyn belent derejelere ýetirilýär.
Mälim bolşy ýaly, Türkiýe Respublikasy ilkinji bolup türkmen Garaşsyzlygyny ykrar eden we ilkinji diplomatik gatnaşyklaryny ýola goýan döwletdir. Türkmenistan bilen Türkiýe Respublikasynyň arasynda diplomatik gatnaşyklar 1992-nji ýylyň 29-njy fewralynda ýola goýuldy. Şol geçen ýyllaryň içinde biziň ýurtlarymyzyň arasynda döwletara gatnaşyklarynyň dürli ugurlary boýunça berk hyzmatdaşlyk döredildi we paýtagtymyzda Türkiýe Respublikasynyň Ilçihanasy işläp başlady. Iki ýurduň döwlet Baştutanlarynyň alyp barýan öňdengörüjilikli syýasatlary, döwletara hyzmatdaşlygyň meseleleriniň çözgüdine bolan döredijilikli çemeleşmeleri netijesinde, biziň döwletimiz we halklarymyz Garaşsyzlyk ýyllarynda umumy abadançylyga gönükdirilen birnäçe ösüşlere eýe boldular.
Milli Liderimiz Türki dilli döwletleriň Baştutanlarynyň Türkiýede geçirilen sammitlerine birnäçe gezek hormatly myhman hökmünde gatnaşdy. Deňhukuklylyk we özara bähbitlilik ýörelgelerine esaslanýan türkmen-türk hyzmatdaşlygy dürli ugurlar boýunça üstünlikli ösdürilýär. Şeýle hem iki döwlet halkara, sebitleýin guramalaryň çäklerinde-de özara hyzmatdaşlyga uly ähmiýet berýärler. Türkmenistanyň we Türkiýe Respublikasynyň Liderleriniň arasyndaky özara ynanyşykly gatnaşyklar, ýokary derejedäki netijeli syýasy gepleşikler ikitaraplaýyn hyzmatdaşlygyň ugurlaryny has hem berkitdi, gatnaşyklaryň täze ugurlaryny we depginini kesgitledi. Şol bir wagtda döwletara gün tertibiniň, halkara we sebitleýin syýasatyň köp meseleleri boýunça özara düşünişmeklik ikitaraplaýyn gatnaşyklaryň yzygiderli berkidilmegine ýardam edýän wajyp görkeziji bolup durýar. Türkmenistanyň we Türkiýäniň arasyndaky diňe dostluk we özara bähbitli hyzmatdaşlyk ýörelgelerine esaslanýan gatnaşyklar strategik häsiýete eýedir.
Dürli derejelerdäki syýasy gepleşikler bilen bir hatarda taraplar söwda-ykdysady gatnaşyklaryň giňeldilmegine we medeni-ynsanperwer ugur boýunça hyzmatdaşlygyň mundan beýläk hem çuňlaşdyrylmagyna ygrarlydyklaryny görkezýärler. Şunuň bilen baglylykda, 2007-nji ýylyň 6-njy dekabrynda döredilen Ykdysady hyzmatdaşlyk boýunça bilelikdäki türkmen-türk hökümetara toparynyň alyp barýan işleri ikitaraplaýyn söwda-ykdysady hyzmatdaşlygyň ileri tutulýan ugurlaryny kadalaşdyrýan ulgam bolup hyzmat edýär. Köp ýyllaryň dowamynda Türkiýäniň Türkmenistanyň esasy syýasy-ykdysady hyzmatdaşlarynyň biri bolup durýandygyny we haryt dolanyşygynyň möçberi babatda öňdebaryjy orny eýeleýändigini bellemek derwaýysdyr. Iki doganlyk döwlet söwda-ykdysady ulgamdaky giň gerimli işleriniň durmuşa geçirilmegi babatda ähmiýetli mümkinçiliklere eýedirler. Ýeri gelende nygtasak, 2000-nji ýyldan bäri ýurdumyzda türkiýeli işewürleriň gatnaşmagynda 110 milliard amerikan dollaryndan gowrak taslamalar we işler ýerine ýetirildi.
Mälim bolşy ýaly, 2023-nji ýylyň 29-njy iýunda Arkadag şäheriniň açylyşy mynasybetli geçirilen giň gerimli dabaralarda Türkiýe Respublikasynyň senagat we tehnologiýalar ministri hem-de Türkiýäniň Palatalar we biržalar birleşiginiň başlygy döwlet Baştutanymyza täze «TOGG» kysymly, ekologik taýdan arassa elektromobilleriň ikisiniň açarlaryny gowşurdy. Bu elektromobiller Türkiýe Respublikasynyň Prezidenti Rejep Taýyp Ärdoganyň adyndan hormatly Prezidentimiz Serdar Berdimuhamedowa we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa sowgat berildi. «TOGG» elektromobilleriniň önümçiliginiň ýola goýulmagy dostlukly ýurduň ähli ugurlar boýunça sazlaşykly ösüş ýoluna düşendiginiň nobatdaky beýanydyr.
Asyrlardan bäri dowam edip gelýän türkmen-türk doganlyk hem-de dostluk gatnaşyklary täze mazmun bilen baýlaşýar. Goý, «Bir millet, iki döwlet» diýen ajaýyp paýhasa ýugrulan Türkmenistan bilen Türkiýe Respublikasynyň köptaraply dostluk we doganlyk gatnaşyklary mundan beýläk has-da berkesin!
Uzukjemal ANNAMYRADOWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň Syýasy kommunikasiýa we internet žurnalistikasy hünäriniň IV ýyl talyby.
