Berkarar döwletiň täze eýýamynyň Galkynyşy döwrüniň her bir ýyly özüniň ajaýyp şygary bilen gelýär. Geçen «Pähim-paýhas ummany Magtymguly Pyragy» ýyly uly üstünliklere beslenip, taryhyň gatlaryna altyn harplar bilen ýazyldy. 2025-nji ýylyň «Halkara parahatçylyk we ynanyşmak ýyly» diýlip yglan edilmegi agzybir halkymyzy diýseň guwandyrdy, buýsanjyna buýsanç goşdy.
Türkmenistan Watanymyz täze ýyly uly üstünlikler hem-de ösüşler bilen garşy aldy. Türkmen halkynyň Milli Lideriniň çuň akyl-paýhasyndan syzylyp çykan, dost-doganlygyň ähmiýetini, gadyr-gymmatyny giňden açyp görkezýän «Türkmenistan — parahatçylygyň we ynanyşmagyň Watany» atly ajaýyp goşgusynda beýan edilişi ýaly, ýurdumyzyň BMG-niň Baş Assambleýasynyň 79-njy mejlisiniň wise-başlyklygyna saýlanylmagy, Türkmenistanyň başlangyjy bilen, Birleşen Milletler Guramasynyň Baş Assambleýasy tarapyndan «2025-nji ýyl — Halkara parahatçylyk we ynanyşmak ýyly» hem-de «Merkezi Aziýa — parahatçylyk, ynanyşmak we hyzmatdaşlyk zolagy» atly Kararnamalaryň biragyzdan kabul edilmegi dünýä döwletleriniň ýurdumyza bolan ynamyny aýdyň görkezdi.
Netijede, eziz Diýarymyzyň hemişelik Bitaraplyk derejesiniň 30 ýyllygynyň belleniljek ýylynda halkymyzyň gadymdan gelýän parahatçylyk söýüjilik, hoşniýetlilik, ynsanperwerlik we myhmansöýerlik däplerini Ýer ýüzünde şöhratlandyrmak maksady bilen, şeýle-de raýatlarymyzdan gelip gowşan teklipler göz öňünde tutulyp, Türkmenistanyň Mejlisi tarapyndan 2025-nji ýyl «Halkara parahatçylyk we ynanyşmak ýyly» diýlip, karar kabul edildi. Hakykatdan hem, täze gadam basan ýylymyzyň bu şygarynda uly many-mazmun bar. Çünki birek-birege ynanyşmagyň bar ýerinde parahatçylyk höküm sürýär.
Häzirki wagtda dünýä döwletleri ýurdumyzyň ählumumy parahatçylyga, özara bähbitli hyzmatdaşlyga esaslanýan daşary syýasatyna uly hormat goýýarlar. Gahryman Arkadagymyzyň we hormatly Prezidentimiziň başlangyçlary dünýäde giň goldaw tapýar. Üstümizdäki ýylda hem ata Watanymyzyň şan-şöhraty artyp, halkara abraýy öňküdenem beýgeler. Ata Watanymyzyň berkararlygy, halkymyzyň bagtyýarlygy barada yzygiderli aladalanýan Gahryman Arkadagymyzyň we Arkadagly Gahryman Serdarymyzyň janlary sag, ömürleri uzak bolsun!
Azat AMANSÄHEDOW,
TOHI-niň Weterinar lukmançylygy fakultetiniň weterinar lukmançylygy hünäriniň 3-nji ýyl talyby.
