
Geçen şanly ýylyň ösüş-özgertmelerinden, şanly wakalaryndan kalby joş alan bagtyýar ildeşlerimiz “Halkara parahatçylyk we ynanyşmak ýyly” şygary astynda geçýän 2025-nji ýylyň ilkinji günlerinden täze güýç bilen işe girişdiler. Ýylyň şygary biz — Ýaşlar gurasynyň wekilleriniň işe hyjuwymyzy artdyryp, täze-täze üstünliklere ruhlandyrdy.
Täze ýylyň öňüsyrasynda hormatly Prezidentimiziň döwet galamyndan çykan «Magtymguly — dünýäniň akyldary» atly ajaýyp kitabyň okyjylara gowuşmagy bizi diýseň begendirdi. Şeýle ruhy serpaýyň elimize gowuşmagy hem-de 2025-nji ýylyň «Halkara parahatçylyk we ynanyşmak ýyly» diýlip atlandyrylmagy bilen türkmen halkynyň Milli Lideri Gahryman Arkadagymyzy we Arkadagly Gahryman Serdarymyzy, tutuş türkmen halkymyzy tüýs ýürekden gutlaýarys.
Mälim bolşy ýaly, şu ýylyň 3-nji ýanwarynda geçirilen sanly ulgam arkaly Ministrler Kabinetiniň täze ýyldaky ilkinji mejlisinde döwlet Baştutanymyz 2025-nji ýylda ýerine ýetirilmeli işleriň meýilnamalary bilen tanyşdy. Mejlisde hormatly Prezidentimiziň degişli Permany esasynda 2025-nji ýylyň «Halkara parahatçylyk we ynanyşmak ýyly» diýlip yglan edilmegi we Türkmenistanyň hemişelik Bitaraplygynyň 30 ýyllygy mynasybetli çäreleri ýokary derejede geçirmek boýunça guramaçylyk döwlet toparynyň döredilmegi bu şanly senäniň dabaralara beslenjekdigini görkezýär.
Halkara parahatçylyk we ynanyşmak ýyly biziň her birimiz, aýratyn he, ýaşlar üçin täze pikirleri döretmäge, özümizi kämilleşdirmäge we jemgyýetimizi agzybir etmek üçin tagalla etmäge mümkinçilik berýär. Parahatçylyk we ynanyşmak adamzat kalbynyň iki ganaty bolsa, olar birleşen mahaly dünýä has beýiklige galýar.
Halkara parahatçylyk we ynanyşmak ýylynyň rowaçly ýyllaryň birine öwrülmegi üçin her birimiz saldamly goşandymyzy goşarys. Garaşsyz, hemişelik Bitarap döwletimiziň daşary syýasatynyň mundan beýläk-de üstünliklere we işjeň häsiýete eýe bolmagy ugrunda uly işleri alyp barýan türkmen halkynyň Milli Lideri Gahryman Arkadagymyzyň hem-de başy başlanan taryhy özgertmeleri, beýik işleri mynasyp dowam etdirýän hormatly Prezidentimiz Arkadagly Gahryman Serdarymyzyň janlary sag, ömürleri uzak bolsun!
Enejan ÝOLDAŞOWA,
TMÝG-niň Kerki etrap geňeşiniň guramaçylyk bölüminiň esasy hünärmeni.