Berkarar döwletiň täze eýýamynyň Galkynyşy döwrüniň hözirini görüp ýaşaýan bagtyýar halkymyz kalplarda kelama öwrülen beýik Pyragynyň şygryýet dünýäsini şygar edinen 2024-nji «Pähim-paýhas ummany Magtymguly Pyragy» ýylyny üstünlikli jemläp, Türkmenistanyň hemişelik Bitaraplygynyň 30 ýyllyk şanly toýunyň halkara derejesinde giňden belleniljek täze, 2025-nji ― Halkara parahatçylyk we ynanyşmak ýylyna uly arzuwlar we ýagşy umytlar bilen gadam basdy.
Hemmämiziň bilşimiz ýaly, 2024-nji ýylyň Türki medeniýetiň halkara guramasy ― TÜRKSOÝ tarapyndan «Türki dünýäsiniň beýik şahyry we akyldary Magtymguly Pyragy ýyly» diýlip yglan edilmegi, beýik şahyrymyzyň doglan gününiň 300 ýyllygyna bagyşlanan çäreleriň 2024 — 2025-nji ýyllarda Birleşen Milletler Guramasynyň Bilim, ylym we medeniýet meseleleri boýunça guramasy ― ÝUNESKO bilen bilelikde bellenilip geçiljek çäreleriň halkara sanawyna girizilmegi nusgawy şahyrymyza, ýurdumyzyň içeri we daşary syýasatyna dünýä möçberinde goýulýan belent sarpanyň aýdyň nyşanydyr. Bulardan başga-da, dünýäniň ençeme ýurtlarynda nusgawy şahyrymyzyň ýadygärliginiň oturdylmagy, beýik Pyragynyň ömrüni we döredijiligini öz içine alýan täsirli çäreleriň geçirilmegi, akyldar şahyryň eserleriniň dünýäniň onlarça halklarynyň dillerine terjime edilmegi beýik söz ussadynyň abraý-mertebesiniň älem-jahana dolmagydyr. Tamamlanan ýylda Aşgabadyň eteginde hormatly Prezidentimiziň gatnaşmagynda akyldar şahyryň 60 metre barabar ägirt uly ýadygärliginiň hem-de doganlyk halklaryň meşhur ýazyjy-şahyrlarynyň heýkelleri oturdylan «Magtymguly Pyragy» medeni-seýilgäh toplumynyň açylmagy, şeýle hem Magtymguly Pyragynyň goşgular ýygyndysynyň çap edilip, okyjylara gowuşmagy kalbymyzy şatlandyryp, egsilmez buýsanjy bagyşlady.
Üstünlikli tamamlanan «Pähim-paýhas ummany Magtymguly Pyragy» ýylynda Arkadagly Gahryman Serdarymyzyň «Änew — müňýyllyklardan gözbaş alýan medeniýet», «Magtymguly — dünýäniň akyldary» hem-de türkmen halkynyň Milli Lideriniň «Hakyda göwheri» atly taryhy kitaplarynyň elimize gowuşmagy ýylymyz üçinem, il-günümiz üçinem gymmatly serpaýdyr. Her birimiz üçin gymmatly çeşme bolup durýan bu kitaplar şanly seneleriň belent ruhuna ýugrulan, şöhratly taryhymyzdan, baý edebi hem medeni mirasymyzdan söz açýan, geljekki ösüşleriň ruhy binýadyny berkidýän eserlerdir. Olar halkymyzyň baý ruhy-medeni we taryhy mirasy bilen içgin gyzyklanýanlar üçin ajaýyp sowgat boldy.
Sözümiň şu ýerinde bir çuňňur hakykaty aýratyn nygtasym gelýär. Ynsanyýet ömrüniň dowamynda beýik maksatlara ýetmek üçin dyngysyz gözlegde, hereketde bolýar. Beýik maksatly ynsanyň arzuw-umytlaryny amala aşyrmagyň iň uly güýji — asudalyk we parahatlyk. Şu nukdaýnazardan, bu gün hemişelik Bitaraplygymyzyň ählumumy parahatçylygy we dostlugy pugtalandyrmakdaky ähmiýetine uly gyzyklanma bildirilýär. Milli diplomatiýamyzda gazanylan üstünlikler bolsa nusga alarlykdyr. Şunuň bilen baglylykda, 2025-nji ýylyň «Halkara parahatçylyk we ynanyşmak ýyly» diýlip yglan edilmegi parahatçylygyň, howpsuzlygyň we durnukly ösüşiň bähbidine Bitaraplygyň dostlary toparynyň döredilmegi üçünji müňýyllykda parahatçylyk taglymatynyň çuňlaşmagyna oňyn täsir etdi.
Goý, ýagşy arzuw-niýetler bilen gadam basan 2025-nji ýylymyz asudalygyň, bagtyň höküm sürjek ýyly bolsun! Ata Watanymyzyň halkara abraýyny barha pugtalandyrýan türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlary sag, belent başlary aman bolsun, döwletli işleri mundan beýläk-de rowaçlyklara beslensin!
Laçyn HÜMMEDOWA,
TDP-niň Tagtabazar etrap komitetiniň EHM operatory.
