Täze taryhy döwrümizde döwletimiz tarapyndan ýaş türkmenistanlylaryň bilim almaklary, ýurdumyza, halkymyza mynasyp gulluk etmekleri üçin ähli şertler döredilýär. Arkadagly Gahryman Serdarymyzyň nygtaýşy ýaly, halkynyň taryhyny bilýän, ýurdunyň gazanýan üstünliklerine buýsanýan, onuň şan-şöhratyny artdyrmaga çalyşýan hakyky watansöýüji nesli kemala getirmek biziň baş maksadymyzdyr.
Mälim bolşy ýaly, ýaşlaryň halkara bilim olimpiadalaryna gatnaşmagy bilen bagly sanly bilim Konsepsiýasyndan gelip çykýan wezipeleri çözmäge döwlet derejesinde aýratyn ähmiýet berilýär. Munuň özi geçirilýän halkara bäsleşikleriň we mekdep okuwçylarynyň arasyndaky ders olimpiadalarynyň netijeliliginiň ýokarlanmagyna ýardam edýär. Ylma teşne talyplar mümkinçiliklerden netijeli peýdalanyp, döwlet we halkara derejesinde geçirilýän olimpiadalarda, bäsleşiklerde öz zehinlerini, ukyp-başarnyklaryny, bilim derejelerini görkezip, ýokary netijeleri gazanýarlar.
Üstünlikli tamamlanan «Pähim-paýhas ummany Magtymguly Pyragy» ýyly meniň durmuşymda hem ýatdan çykmajak wakalara baý boldy. Biz – ýaşlar üçin döredilýän giň mümkinçiliklerden peýdalanyp, maňa hem geçen ýylyň 26-njy noýabr we 2-nji dekabr aralygynda Russiýa Fededrasiýasynyň Moskwa şäherinde Patris Lumumba adyndaky Halklaryň dostlugy uniwersitetinde ýokary okuw mekdepleriniň arasynda geçirilen matematika dersinden «RUDN MATH OLYMP» olimpiadasyna gatnaşyp, III baýrakly orna mynasyp bolmak miýesser etdi. Bu olimpiada biziň üçin uly tejribe mekdebi boldy. Şunda Russiýanyň tebigy-syýahatçylyk we taryhy-medeni mümkinçilikleri bilen tanyşmak has-da täsirli boldy.
Mundan başga-da, geçen ýylyň 22 — 25-nji maýynda Türkmenistanyň Bilim ministrliginiň hem-de Daşary işler ministrliginiň Halkara gatnaşyklary institutynyň bilelikde guramagynda «Halkara gatnaşyklary: parahatçylyk dialogynyň medeniýeti» atly halkara bäsleşik üstünlikli geçirildi. Oňa Merkezi Aziýa we Hazarýaka döwletleriniň, Türkiýe Respublikasynyň, Hytaý Halk Respublikasynyň 11 sany abraýly ýokary bilim ojagyndan 40-a golaý magistrler we talyplar, şeýle hem ýurdumyzyň ýokary okuw mekdepleriniň 22-sinden 220-ä golaý talyp gatnaşdy. Halkara gatnaşyklarynda we syýasatda matematikanyň, geosyýasy modelirlemäniň ornuny şöhlelendirýän halkara bäsleşik Türkmenistanda ilkinji gezek geçirildi. Şunda bäsleşigiň şahsy tapgyrynda Türkmenistanyň Daşary işler ministrliginiň Halkara gatnaşyklary institutynyň talyplary 3 altyn, 8 kümüş, 1 bürünç medala mynasyp boldular. Şeýle hem toparlaýyn tapgyrda 3 topar altyn, 5 topar kümüş we 8 topar bürünç medal gazandy. Toparlaýyn tapgyrda biziň toparymyz hem altyn medalyň eýesi boldy. Bu örän netijeli görkeziji bolup, şeýle üstünlikler ylma bolan höwesimizi artdyrýar.
Häzirki zaman ylmyny kämilleşdirmek, sanly bilimi ösdürmek ugrunda edilýän tagallalar bagtyýar geljegimiz üçin ädilýän iň uly ädimdir. Bu babatda beýik işleri durmuşa geçirýän türkmen halkynyň Milli Lideri Gahryman Arkadagymyzyň hem-de hormatly Prezidentimiziň janlary sag, ömürleri uzak bolsun!
Goçmyrat PENJIÝEW,
Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 3-nji ýyl talyby.
