Ynha, Berkarar döwletiň täze eýýamynyň Galkynyşy döwrüniň ýene-de bir sahypasy açyldy: ak arzuwlar, belent maksatlar bilen täze ýyla gadam basdyk. 2025-nji ýyl ýurdumyzda we bütin dünýäde «Halkara parahatçylyk we ynanyşmak ýyly» diýlip yglan edildi. Şu ajaýyp günlerde hormatly Prezidentimiziň «Magtymguly — dünýäniň akyldary» atly täze kitabyny elimize almagymyz baýramçylyk ruhumyzy has-da joşdurýar, bizi täze üstünliklere ruhlandyrýar.
Türkmen halkynyň at-owazasyny dünýä tanadan Gündogaryň beýik akyldary Magtymguly Pyragynyň dürdäne döredijiliginiň ýyllar geçdigiçe, ynsan köňüllerine saçýan şuglasy has-da güýçlenýär, barha beýgelýär. Türkmen halky beýik söz ussatlaryna hemişe hormat goýýar. Şoňa görä-de, hormatly Prezidentimiziň «Magtymguly — dünýäniň akyldary» atly täze kitaby hem söz ussadymyzyň ýubileý senesi mynasybetli bagtyýar halkymyza gymmatly sowgatdyr. Arkadagly Gahryman Serdarymyzyň täze kitabyny söz ussadynyň hormatyna sözden ýapylan serpaý, dörediji Milli Liderimiziň «Pähim-paýhas ummany Magtymguly Pyragy» atly dürdäne şygrynyň logiki dowamy hökmünde kabul etdik.
Baý many-mazmunly täze kitapda halkymyzyň asyrlardan gözbaş alýan medeni mirasyny, ruhy gymmatlyklaryny dikeltmekde, nusgawy şahyrymyz Magtymguly Pyragynyň döredijilik mirasyny öwrenmekde, aýawly saklamakda, wagyz etmekde hem-de geljek nesillere ýetirmekde maksatnamalaýyn işleriň durmuşa geçirilýändigi barada giňişleýin söhbet açylýar. Bu kitap eziz Watanymyzyň we merdana halkymyzyň bähbidini öňe ilerletmekde türkmen halkyna goldaw bermek bilen, diňe bir ýurdumyzyň ylmy-edebi hazynasynda däl-de, eýsem, dünýä jemgyýetçiliginiň ylmy hazynasynda-da mynasyp orun alar.
Arkadagly Gahryman Serdarymyz Magtymguly Pyragynyň edebi mirasyna bagyşlanan «Magtymguly — dünýäniň akyldary» atly täze eserinde: «Magtymguly Pyragynyň eserleri mizemez binadyr. Bu binanyň sütünleri älem-jahana, barlyga hem-de barlygy bar edene söýgüden gurlandyr. Bakylyk suwuna eýlenendir. Halkyna hem-de ähli adamzada bolan mähire ýugrulandyr» diýip jaýdar belleýär. Görnüşi ýaly, beýik akyldar şahyr Magtymgulynyň döredijiligi ruhy gymmatlyk hökmünde ynsanlaryň kalbyna çuňňur ornaşýar. Beýik şahyrymyzyň edebi mirasy ýaş nesillerimiz üçin hem ylham çeşmesidir, kämil watançylyk kelamydyr, dünýä akyl ýetirmegiň beýik nusgasydyr.
Şu pursatdan peýdalanyp, hormatly Prezidentimizi «Magtymguly — dünýäniň akyldary» atly täze kitabynyň çap edilmegi mynasybetli tüýs ýüregimizden gutlaýarys hem-de milli edebi mirasymyzy öwrenmekde gymmatly gollanma boljak şeýle eserleriniň höwrüniň köp, döwet galamynyň mundan beýläk hem ýiti bolmagyny tüýs ýürekden arzuw edýäris. Ýaş nesillere kämil bilim we terbiýe bermekde, hünär öwretmekde ähli zerur mümkinçilikleri döredip berýän türkmen halkynyň Milli Lideri Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli, umumadamzat ähmiýetli başlangyçlary mundan beýläk-de rowaçlyklara beslensin!
Firuza DOSÇANOWA,
Türkmen oba hojalyk institutynyň Agronomçylyk fakultetiniň 3-nji ýyl talyby.
