Dana ata-babalarymyz pähim-paýhasyny sözüň keramatly güýjüne siňdirip, nesillere ýörelge boljak kitaplary we eserleri miras galdyrypdyrlar. Şu asylly ýörelgä eýerip, Gahryman Arkadagymyzyň halkymyza peşgeş beren «Ömrümiň manysy» atly taryhy-filosofiki eseri türkmen halkynyň milli gymmatlyklaryndan söhbet açmak bilen, milletiň ruhy ýüzüni dünýä äşgär edýär. Kitapda durmuşda özüňi dogry alyp barmagyň kadalary, onuň ähmiýeti beýik ömrüň mysalynda beýan edilýär.
Ynam bar ýerde öňegidişlik bolýar. Ýaşlara ynam edilmegi olarda jogapkärçilik duýgusyny hasam artdyrýar. Bu gün tutuş halk ýaşlara ynam bildirýär. Halk ynamy bolsa mukaddesdir. Ynama ygrarlylyk türkmeniň zandynda bar. Hut şonuň üçinem, dünýä jahankeşdeleriniň türkmen halky barada: «Türkmenleri ynandyrmak aňsat däl, ynanansoňlar ynamyndan dändirmek aňsat däl» diýen jümlesi hem Gahryman Arkadagymyzyň köňül kelamy bolan bu eserinde mynasyp ornuny tapypdyr.
Kitapda Gahryman Arkadagymyz 2020-nji ýylda Bütindünýä welosiped güni mynasybetli Olimpiýa şäherçesinde ÝUNISEF-niň ýurdumyzdaky wekilhanasynyň ýolbaşçysy bilen duşuşykda agtygy Kerimiň onuň bilen iňlis dilinde erkin söhbetdeşlik edendigini ýatlaýar. Kerimiň halkara guramanyň wekiline ýurdumyzda ýaş nesiller üçin döredilýän şertler barada, ýurdumyzyň çagalar baglarynda, ak mermere beslenen mekdeplerde dünýä dilleriniň ençemesiniň öwredilýändigi barada buýsanç bilen gürrüň berýär. Hormatly Arkadagymyzyň bu kitabyndaky: «Men öz agtygymyň mysalynda tutuş türkmen ýaşlarynyň geljegini görýärin» diýip nygtaýar.
Eserde halk döredijiliginiň eserleri, nakyllardyr atalar sözleri, pähimler edebi taýdan ussatlyk bilen çeper beýan edilipdir. Ýaş nesilleriň bagtyýar durmuşynyň binýadyny goýan Gahryman Arkadagymyz bu gymmatly eserinde geljegi diňe geçmişe daýanyp gurmalydygyny nygtaýar. Bu eserde Milli Liderimiziň başlangyjy bilen umumadamzat medeniýetiniň ösüşine saldamly goşant goşan şöhratly pederlerimiziň peşgeş goýan mirasyny öwrenmek, wagyz etmek we toplamak boýunça alnyp barylýan ylmy-edebi işler öz beýanyny tapýar. Eseriň baý mazmunly bölümlerinde öňe sürülýän oý-pikirler, ylmy seljermeler, filosofik garaýyşlar tolgundyryjy wakalar okyjyny çuňňur oýlandyrýar. Bu kitapda hormatly Arkadagymyzyň öz ömrüniň manyly menzilleri dürli mysallar arkaly durmuşy pursatlar giňden orun tapýar. Bu garaýyşlar ýaş nesilleri ata Watanymyzy gülletmek, gözüň göreji deýin goramak hem-de ösdürmek ugrundaky mukaddes işlere has-da ruhlandyrýar.
Gahryman Arkadagymyzyň «Ömrümiň manysy» atly kitaby watansöýüjilige ýugrulan kitapdyr. Şeýle ajaýyp eserleri peşgeş berýän Gahryman Arkadagymyzyň janynyň sag, ömrüniň uzak, döredijilik üstünlikleriniň rowaçlyklara beslenmegini tüýs ýürekden arzuw edýäris! Dünýämizi mähir bilen gurşaýan Gahryman Arkadagymyzyň döwet-galamy ýiti bolsun!
Hemra NYÝAZMYRADOW,
Türkmenistanyň Serhet institutynyň 3-nji ýyl talyby.
