«Halkara parahatçylyk we ynanyşmak ýyly» diýlip atlandyrylan üstümizdäki ýyla gadam basan türkmen ili hormatly Prezidentimiziň baştutanlygynda has-da abadan geljegine barýar. Arkadagly Gahryman Serdarymyzyň taýsyz tagallalary netijesinde ýurdumyzyň ykdysady ösüşiniň bady barha artýar. Şeýle öňegidişligiň gazanylmagynda önümçilik kuwwatlyklaryna innowasion tehnologiýalaryň, sanly ykdysadyýetiň giňden ornaşdyrylmagy uly ähmiýete eýe bolýar.
Mälim bolşy ýaly, ata Watanymyzda «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasy» kabul edildi. Milli maksatnamanyň üstünlikli durmuşa geçirilmegi ýurdumyzyň ykdysadyýetiniň diwersifikasiýalaşdyrylmagyna we ykdysadyýetiň innowasion industrial esasda durnukly ösüşiniň saklanmagyna, şeýle hem ýurduň tehnologik üpjünçiliginiň ýokarlanmagyna uly ýardam berer. Şunda ýurdumyzyň ýokary we ýörite orta hünär okuw mekdepleriniň öňünde durýan esasy wezipe zähmet bazarynyň ösýän talaplaryna laýyklykda, giň gözýetimli, çuňňur bilimli, başarnykly şahsyýetleri, ylmyň, tehnikanyň we medeniýetiň dürli ugurlaryndan baş çykarýan maglumat tehnologiýalaryny ulanmaga, pikirlenmäge ukyply, kämil hünärmenleri ýetişdirmekden ybarat bolup durýar.
Hormatly Prezidentimiziň nygtaýşy ýaly, biziň esasy maksadymyz eziz Watanymyzy beýik geljege tarap ynamly öňe alyp barmakdan ybaratdyr. Şoňa görä-de, ähli tagallalarymyzy Garaşsyz, hemişelik Bitarap döwletimizi mundan beýläk-de gülledip ösdürmäge, merdana halkymyzyň ýaşaýyş-durmuş derejesini has-da ýokarlandyrmaga gönükdirmelidiris.
Ykdysady ösüş her bir ýurduň durnukly öňe gitmeginiň möhüm şertidir. Şunuň bilen baglylykda, 2024-nji ýylyň 24-nji sentýabrynda geçirilen Türkmenistanyň Halk Maslahatynyň mejlisinde Milli Liderimiz ykdysady üstünliklerimiziň mähriban halkymyzyň ýaşaýyş-durmuş derejesini has-da ýokarlandyrmaga gönükdirilendigini aýratyn buýsanç bilen belledi. Gahryman Arkadagymyz ýurdumyzy ýokary depginde ösdürmegiň täze tapgyryna badalga berilmeginiň möhüm wezipeleriň biridigini kesgitläp, Türkmenistanyň Halk Maslahatynyň geljek ýyl geçiriljek mejlisine dürli ugurlar bilen bir hatarda, 2026 — 2052-nji ýyllarda sanly ykdysadyýeti ösdürmegiň Maksatnamasynyň taslamasyny hödürlemegi teklip etdi. Munuň özi sanly ykdysadyýeti has-da kämilleşdirmekde möhüm başlangyçdyr.
Şunuň bilen baglylykda, islendik döwletiň ykdysadyýetinde durmuş syýasatyna aýratyn üns berilýär. Şunda jemgyýetiň durmuş-ykdysady şertlerini sazlaşdyrmak boýunça döwletiň alyp barýan işidir. Ol islendik döwletiň içerki syýasat ugrunyň möhüm bölegini düzýär. Ol milli ykdysadyýetiň ösen derejesinden habar berýär. 2025-nji ýylyň 1-nji ýanwaryndan zähmet haklarynyň, pensiýalaryň, döwlet kömek pullarynyň, talyp we diňleýji haklarynyň möçberleriniň 10 göterim ýokarlandyrylmagy döwletimizde durmuş ugurly ykdysady syýasatyň üstünlikli amala aşyrylýandygyny tassyklaýar.
Milli ykdysadyýetimizi döwrebaplaşdyrmaga aýratyn üns berýän türkmen halkynyň Milli Lideri Gahryman Arkadagymyzyň hem-de hormatly Prezidentimiziň janlary sag, ömürleri uzak bolsun, beýik işleri elmydama rowaçlyklara beslensin!
Akja BATYROWA,
Türkmen oba hojalyk institutynyň Weterinar lukmançylygy fakultetiniň Oba hojalygynyň guralyşy we dolandyrylyşy kafedrasynyň mugallymy.
