Döwlet Garaşsyzlygymyzyň buýsançly taryhy ýazylýar. Otuz üç ýylyň içinde amala aşyrylan giň möçberli özgertmeler we ýokary ykdysady görkezijiler Türkmenistanyň dünýä ýüzündäki abraýyny ymykly berkitdi.
Garaşsyz döwletimizde ynsan saglygyny goramak, adamlaryň ömrüni uzaltmak, keselleriň öňüni almak, sagdyn durmuş kadalaryny ornaşdyrmak boýunça netijeli işler alnyp barylýar. Garaşsyzlyk ýyllary içinde paýtagtymyz Aşgabatda, welaýat merkezleriniň ählisinde öňdebaryjy innowasion tehnologiýalar ornaşdyrylan iri saglygy goraýyş merkezleri, ýöriteleşdirilen hassahanalar gurlup, ulanylmaga berildi.
Lukman Arkadagymyzyň hut özüniň ýolbaşçylygynda Garaşsyzlygyň ilkinji ýyllarynda işlenip düzülen «Saglyk» Döwlet maksatnamasy indi çärýek asyrdan gowrak wagt bäri üstünlikli durmuşa geçirilip, ýurdumyzda ösen jemgyýetçilik saglygy goraýyş ulgamy kemala geldi. Maksatnamada kesgitlenen wezipelere laýyklykda, saglygy goraýyş-anyklaýyş, bejeriş-dikeldiş we şypahana-dynç alyş düzümleri döredilip, olaryň dünýä standartlaryna doly laýyk gelýän döwrebap binalary gurlup ulanmaga berildi.
Agzybirlik, bitewilik ýörelgesi Garaşsyzlyk bagtyna eýe bolanymyzdan soň, ýurdumyzda döwlet syýasatynyň ileri tutulýan ugruna öwrüldi. Ähli üstünliklerimiziň hem-de rowaçlyklarymyzyň özeni bolan bu mukaddes ýol-ýörelge häzirki Galkynyşly döwrümizde has-da rowaçlanýar. Berkarar döwletiň täze eýýamynyň Galkynyşy döwrüniň her güni kalplara şatlyk, mähir, nur çaýýar. Döwrümiziň arka atylýan her gününiň mysalynda şu hakykata şaýat bolmagyň üýtgeşik lezzeti we çäksiz buýsanjy biziň göwnümizi ganatlandyrýar, eşretli durmuşymyzy täze many-mazmun bilen baýlaşdyrýar. Şeýle Berkarar ýurtda ýaşamak, işlemek, döretmek, gurmak tüýs bagtyň çüwmesidir, ykbalyň göterilmegidir.
Garaşsyzlyk ýyllarynda saglygy goraýyş ulgamynda gazanylan ösüşleriň belent sepgitlere ýetendigini we Berkarar döwletiň täze eýýamynyň Galkynyşy döwründe hormatly Prezidentimiziň ýolbaşçylygynda ilatyň jan saglygyny gorap saklamak boýunça alnyp barylýan işleriň ummasyzdygyny guwanç bilen aýdyp bileris. Ýurdumyzy sagdynlygyň ýurduna öwren, halkyň saglygyny ähli zatdan ileri tutýan lukman Arkadagymyzyň, peder ýoluny mynasyp dowam etdirýän hormatly Prezidentimiziň bize zähmet çekmäge döredip berýän giň şertleri üçin hoşallygymyzy bildirýäris.
Alma ANNABAÝEWA,
Myrat Garryýew adyndaky Türkmenistanyň Döwlet lukmançylyk uniwersitetiniň Lukmançylyk gullugynyň guralyşy we usulyýeti kafedrasynyň mugallymy.
