Magtymguly Pyragynyň döredijiliginde ýaş nesilleri milli ruhda terbiýelemäge, olaryň ruhy dünýäsini baýlaşdyrmaga, ýagşy bilen ýamany tapawutlandyryp, ýaşlarda ynsanyň gowy häsiýetlerine söýgi döretmäge itergi berýän nusgalyk şygyrlar eriş-argaçdyr.
Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň we Arkadagly Gahryman Serdarymyzyň taýsyz tagallalary netijesinde akyldar şahyrymyz Magtymguly Pyragynyň döredijiligini ylmy nukdaýnazardan öwrenmäge, okyjylar köpçüligine ýetirmäge giň ýol açyldy. Muňa soňky gazanylanlar hökmünde, «Magtymguly Pyragynyň golýazmalar toplumynyň» ÝUNESKO-nyň «Dünýäniň hakydasy» maksatnamasynyň halkara sanawyna girizilmegini, hormatly Prezidentimiziň BMG-niň Baş Assambleýasynyň 78-nji mejlisinde Magtymguly Pyragynyň goşgusyny okamagyny, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň Halk Maslahatynyň mejlisindäki çykyşynda şahyryň döredijiliginiň ähmiýetini nygtamagyny, şahyryň ömrüne we döredijiligine bagyşlanyp ensiklopediýanyň taýýarlanylmagyny görkezmek bolar.
Türkmenistanyň Alp Arslan adyndaky milli drama teatry tarapyndan «Magtymguly Pyragy» atly drama eseriniň, Magtymguly adyndaky milli sazly drama teatry tarapyndan sahnalaşdyrylan «Magtymguly» operasynyň, olaryň görkezilişiniň ähli welaýatlarda guralmagy, Türkmenistanyň Telewideniýe, radiogepleşikler we kinematografiýa baradaky döwlet komiteti tarapyndan Magtymguly Pyraga bagyşlanan çeper we dokumental filmleriň surata düşürilmegi munuň aýdyň subutnamasydyr. Şeýle hem Magtymguly Pyragynyň ömrüne we döredijiligine bagyşlanan teleradiogepleşikler toplumlary ýaýlymlarda yzygiderli berlip durulýar.
Türkmenistanyň Magtymguly adyndaky Halkara baýragynyň, «Magtymguly Pyragy» medalynyň bolmagy şahyryň adynyň ebedileşdirilmegi ugrunda alnyp barylýan işleriň ilerlemegidir. Häzirki wagtda «Pähim-paýhas ummany Magtymguly Pyragy» atly bäsleşiginiň geçirilmegi şahyryň ömri döredijiligine bagyşlanan eserleriň, ylmy işleriň artmagyna getirýär.
Ynsanperwerligiň beýik waspçysy Pyragynyň edebi mirasynyň — umumadamzat edebi-ruhy gymmatlygyna öwrülen döredijiliginiň Watan, il-halk, dost-doganlyk, parahat durmuş, ýagty geljek baradaky parasatly pikir-garaýyşlary, kämil ynsan, kämil jemgyýet baradaky öňe süren ideýalarynyň umumadamzat bähbidine gönükdirilen möhüm ugurlary Gahryman Arkadagymyzyň we Arkadagly Gahryman Serdarymyzyň baştutanlygynda özüniň mynasyp beýanyny tapýar.
Selbi ANNABAÝEWA,
Türkmen oba hojalyk institutynyň Gidromeliorasiýa we oba hojalygyny mehanizmleşdirmek fakultetiniň Agroinžener hünäriniň 3-nji ýyl talyby.
