Berkarar döwletiň täze eýýamynyň Galkynyşy döwründe ýaş nesilleriň bilim başarnyklaryny, sözleýiş endiklerini, daşary ýurt dillerini işjeň öwrenmeklerini, irki ösüşini we mekdebe taýýarlygyny netijeli alyp barmaga aýratyn ähmiýet berilýär.
Mekdebe çenli bilim-terbiýe ulgamynda hem bu işler häzirkizaman tejribesi esasynda we milli häsiýetde dowam etdirilýär. Bu ugurda körpeler bilen geçirilýän okuw-terbiýeçilik işleri bilen bir hatarda goşmaça bilim bermek, öwrenilenleri özleşdirmek, çagalarda ilkinji hünär endiklerini kemala getirmek maksady bilen dürli ugurly gurnaklar hem hereket edýär.
Ýeri gelende bellesek, biziň ýöriteleşdirilen çagalar bakja-bagymyzda hem okuwdan daşary goşmaça bilim bermek, şol sanda rus dilini çuňlaşdyryp öwretmek maksady bilen «Diller ― dostluk köprüsi» atly gurnak döredildi. Bu gurnaga çagalar ýaş aýratynlyklaryna görä öz islegleri boýunça kabul edilýär.
Rus dilini öwretmäge ýöriteleşdirilen gurnakda onlarça çagalar rus dilinde gürlemek, sözleri öwrenmek, çykyşlary (aýdymlary, goşgulary) ýerine ýetirmek bilen meşgullanýarlar. Tejribeli rus dili mugallymynyň alyp barýan gurnak sapagy hepdede bir gezek guralyp, ol ýarym sagat dowam edýär. Gurnagyň agzalary bilen gyzyklanma çäreleri, okuw-terbiýeçilik işleri geçirilýär. Esasan hem, bu gurnakda çagalara rus dilini öwretmek oýun usullary arkaly amala aşyrylýar. Çagalaryň uly gyzyklanma we höwes bilen rus dilini öwrenmeklerini netijeli alyp barmak maksady bilen sanlylaşdyrylan serişdeler hem işjeň peýdalanylýar.
Gurnakda dil öwretmegiň usuly talaplary berjaý edilip, pedagogikanyň öňdebaryjy tejribelerine esaslanylýar. Rus dilinde taýýarlanylan ekran eserlerine tomaşa etmek, audio görnüşli rus ertekilerini sahnalaşdyrmak ýaly gyzyklanma çäreleri bolsa gurnagyň agzalarynyň has-da kämilleşmegine täsir edýär.
Çagalar bakja-bagynda geçirilýän çärelerde, baýramçylyklarda, säherliklerde, bäsleşiklerde hem «Diller ― dostluk köprüsi» atly gurnagyň işjeň agzalarynyň rus dilindäki çykyşlaryna aýratyn orun berilýär we olar höweslendirilýär. Olaryň çykyşlary, ýerine ýetirijilik ussatlygy beýleki körpelerde hem dil öwrenmäge bolan höwesi artdyrýar.
Terbiýeçi gurnakçy özüne ynanylan gurnak işini maksadalaýyk we netijeli alyp barmak maksady bilen öz usulyýet goruny, usuly burçuny yzygiderli baýlaşdyrýar we täze maglumatlar bilen üstüni ýetirýär.
Ajaýyp zamanamyzda ýaş nesilleriň kämil terbiýelenmegi we dostluk köprüsi bolan daşary ýurt dillerini öwretmegiň usulyýetiniň kämilleşdirilmegi ugrunda döredilýän mümkinçilikler biziň her birimizi buýsandyrýar we bilim-terbiýeçilik işgärleriniň ählisini yhlasly zähmet çekmäge ruhlandyrýar. Ýaş nesilleriň ýokary derejede mekdebe taýýarlanylmagy we döwrebap ruhda kemala getirilmegi üçin aňrybaş şertleri döredip berýän Gahryman Arkadagymyza hem-de Arkadagly Gahryman Serdarymyza egsilmez alkyşlar aýdýarys.
Tawus ANNAMÄMMEDOWA,
Mary şäherindäki rus dilini çuňlaşdyryp öwredýän 21-nji çagalar bakja-bagynyň müdiri, TDP-niň işjeň agzasy.
