Ýangyç-energetika, nebitgaz senagaty milli ykdysadyýetimiziň esasy pudaklarynyň biridir. Onuň eksport mümkinçiliklerini giňeltmek boýunça maksatnamalary durmuşa geçirmekde bu pudaga möhüm ähmiýet berilýär. Energetika ulgamynda halkara hyzmatdaşlygy tebigy gazyň gorlary boýunça dünýäde dördünji orny eýeleýän Türkmenistanyň ykdysady strategiýasynyň ileri tutulýan ugrudyr. Bu ulgamda durmuşa geçirilýän syýasat uzakmöhletleýin, açyklyk, milli bähbitleri nazara almak hem-de özara jogapkärçilik ýörelgesi esasynda guralýar. Geçen ýakyn ýyllarda ýurdumyzda ýangyç-energetika, nebitgaz pudaklaryny ösdürmek boýunça dünýä ähmiýetli taslamalaryň, halkara forumlarynyň ençemesi geçirildi.
Özara bähbitli hyzmatdaşlyk meselelerine oňyn çemeleşme, milli Liderimiziň energetika howpsuzlygynyň täze arhitekturasyny kemala getirmäge gönükdirilen başlangyçlary dünýä jemgyýetçiliginiň giň goldawyna mynasyp boldy. Birleşen Milletler Guramasynyň Baş Assambleýasy tarapyndan iki gezek kabul edilen «Energiýa serişdeleriniň ygtybarly we durnukly üstaşyr geçirilmegi hem-de durnukly ösüşi we halkara hyzmatdaşlygy üpjün etmekde onuň hyzmaty» hakyndaky kararnama hem munuň aýdyň subutnamasydyr.
2019-nji ýylyň 28-nji iýunynda Ahal welaýatynda gurlan täze iň döwrebap senagat toplumynyň — tebigy gazdan benzin öndürýän zawodyň açylyş dabarasy hem, diňe biziň ýurdumyzyň däl, eýsem, dünýäniň ýangyç-energetika pudagynda iň uly ädimleriň biri boldy. Türkmenistanyň energetika strategiýasynyň üstünlikli durmuşa geçirilýändiginiň subutnamasy bolan bu senagat toplumy «Dünýäde tebigy gazdan benzin öndürýän ilkinji zawod» hökmünde Ginnesiň rekordlar kitabyna girizildi hem-de Şweýsariýanyň Federal tehnologiýa institutynyň «Innowasion tehnologiýalar» hem-de ABŞ-nyň Daşky gurşawy goramak gaznasynyň «Ekologiýa taýdan arassa» güwänamalaryna mynasyp boldy.
Şeýle-de 2019-njy ýylda energetika pudagynyň dünýä bilermenlerini ýurdumyza jemlän Birinji Hazar ykdysady forumynyň çäklerinde bu ulgamda ýurdumyzda durmuşa geçirilmegi göz öňünde tutulýan täze taslamalar tanyşdyryldy.
Döwletgeldi BADAGLYÝEW,
Türkmenistanyň Döwlet energetika institutynyň mugallymy.
