Berkarar döwletiň täze eýýamynyň Galkynyşy döwründe döwlet syýasatymyzyň tutuş many-mazmunyny özünde jemleýändigi babatda hem-de döwletliligi berkitmegiň ähli jähetlerini hukuk taýdan kemala getirmekde, döwletiň we jemgyýetiň ösüşleriniň hemme tapgyrlaryny guramaçylyk-hukuk taýdan esaslandyrmakda Türkmenistanyň Halk Maslahatynyň möhüm ähmiýeti bardyr.
Ata-babalarymyzyň nesillerimize miras goýan pähim-paýhaslylyk ýörelgelerini kämilleşdirmek, iň wajyp syýasy, ykdysady, durmuş meselelerini maslahatlaşyp çözmek ýaly asylly däplerinden ugur alyp we umumy ykrar edilen demokratik ýörelgelere eýerip, Türkmenistanyň Halk Maslahaty türkmen halkynyň milliligine mahsus kadalara esaslanýar. «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasyny» hem-de «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyny» durmuşa geçirmekde Türkmenistanyň Halk Maslahatynyň dolandyryş çözgütleriniň ähmiýeti uludyr.
Bilşimiz ýaly, şu ýylyň 20-nji aprelinde türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlyklyk etmeginde Halk Maslahatynyň mejlisi geçirildi. Gahryman Arkadagymyz ol mejlisde eden taryhy çykyşynda: «Elbetde, Halk Maslahatynyň döwletimizde, jemgyýetimizde tutýan orny örän uly bolmalydyr» diýip belledi hem-de amala aşyrylýan işleriň kadalaryny anyk kesgitledi. Türkmenistanyň Halk Maslahatynyň Başlygy Gahryman Arkadagymyz ol kadalary şeýle beýan etdi: «Bu kadalar demokratiýadan, aýanlykdan, adalatlylykdan, kanunyň hökmürowanlygyndan, halkara hukugynyň umumy ykrar edilen kadalaryny ileri tutmakdan, adamyň we raýatyň kanunyň öňündäki deňliginden, adamyň hukuklaryna we azatlyklaryna hormat goýmakdan, çözgütleri erkin ara alyp maslahatlaşmakdan hem-de kabul etmekden, jemgyýetçilik pikirini nazara almakdan ybaratdyr».
Ýakynda, 18-nji iýulda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň ýolbaşçylygynda geçirilen Türkmenistanyň Halk Maslahatynyň Prezidiumynyň mejlisinde hem taryhy ähmiýetli çözgütler kabul edildi. Mejlisiň dowamynda mukaddes Garaşsyzlygynyň 32 ýyllyk baýramyna hem-de Türkmenistanyň Halk Maslahatynyň mejlisine taýýarlyk görmek bilen baglanyşykly meseleler, şeýle-de hormatly Prezidentimiziň 14-nji iýulda geçiren Türkmenistanyň Ministrler Kabinetiniň giňişleýin mejlisinde öňde goýan wezipelerini ýerine ýetirmek babatynda edilmeli işler ara alnyp maslahatlaşyldy, degişli dolandyryş çözgütleri kabul edildi. Şonuň ýaly hem bu mejlisde «Türkmenistanyň Halk Maslahatynyň mejlisini çagyrmak we guramaçylykly geçirmek hakynda», «Türkmenistanyň Halk Maslahatynyň Ýaşulular geňeşi hakynda» Türkmenistanyň Halk Maslahatynyň Prezidiumynyň Kararlary kabul edildi we Türkmenistanyň Halk Maslahatynyň Ýaşulular geňeşi döredildi. Kabul edilen taryhy çözgütleriň dolandyryş ulgamynyň syýasy-hukuk esaslaryny kämilleşdirmekde ähmiýetiniň uly boljakdygyny buýsançly bellemek gerek.
Annam PIRLIÝEW,
Ahal welaýat kazyýetiniň uly maslahatçysy.
