Türkmenistan Birleşen Milletler Guramasy bilen bilelikde ynsan saglygyny goramak babatynda sazlaşykly işleri alyp barýar. Ýurdumyz bu ugurda baý tejribe toplap, ynsan saglygyny goramakda, keselleriň öňüni almakda we ýok etmekde uly işleri amala aşyrýar. Şeýle-de, arakhorluga, çilimkeşlige, neşe serişdelerine garşy göreş çäreleri öz netijesini berdi.
Edil şu günler „Öýkeniň howply täze döremelerine garşy göreşiň“ biraýlygynyň çäklerinde keseliniň öňüni almak boýunça ähli ýerlerde degişli çäreler geçirilip, wagyz-nesihat duşuşyklary yzygiderli guralýar. Türkmenistanyň Saglygy goraýyş we Derman senagaty Ministrliginiň „Öýkeniň täze howply döremelerine garşy göreşiň bir aýlygyny geçirmek hakynda“ meýilnama laýyklykda her ýylyň maý aýynda Lebap welaýat onkologiýa hassahanasynda hem onkolog, rentgenolog, pulmanolog, maşgala lukmanlaryň gatnaşmagynda ylmy-amaly konferensiýalar geçirilýär. Konferensiýalar wideo şekiller görkezmek arkaly bolup, onuň maksady keseliň wagtynda öňüni almakdan ybarat. Şeýle çäreler, wagyz-nesihat düşündirişler özleriniň oňyn netijelerini berýär.
Geçirilýän çärelerde zyýanly endiklerden daşda durup, sport bilen yzygiderli meşgullanmagyň sagdyn jemgyýeti gurmakda örän peýdalydygy dogrusynda lukmanlar yzygiderli çykyş edýärler. Olar her gün kadaly iýmitlenip, doly ukyny almagymyz zerurlygy, gündelik iýmitimizde ter gök otlary iýmegi endige öwrülmegi hem-de bedenterbiýe we sport bilen meşgullanmagyň ynsan saglygyna ähmiýetiniň uludygy dogrusynda aýratyn beleýärler. Şeýle çäreleriň geçirilip durulmagy, Watanymyzyň ýagty ertiti bolan kuwatly neslimiziň hem zyýanly ebndiklerden daşda durup, sagdyn, berk bedenli bolup ýetişmeklerine hem peýdasy uludyr. Mahlasy, sagdyn ýaşamak – saglykly ömrüň gözbaşydyr.
Aziz PAHRYÝEW,
Lebap welaýat onkologiýa hassahanasynyň lukmany.
