Häzirki wagtda akyldar şahyrymyz Magtymguly Pyragynyň dünýä edebiýatynyň altyn hazynasyna giren baý hem-de gymmatly edebi mirasy içgin öwrenilýär. Beýik nusgawy şahyryň döredijilik mirasy dünýä edebiýatynyň genji-hazynasyna girdi.
Ýurdumyzda, şeýle hem daşary ýurtlarda beýik şahyra we akyldara bagyşlanan dabaralar geçirilýär. Şol çäreler Magtymgulynyň bahasyna ýetip bolmajak edebi mirasyny hem-de filosofiki garaýyşlaryny, onuň eserleriniň milli we dünýä edebiýatyny baýlaşdyrmaga eden täsirini ylmy taýdan öwrenmek boýunça uly ähmiýete eýedir.
Toý-baýramyň joşgunyny ýada salýan, gadymy Jeýhun derýasy bilen durnagöz çeşme kimin dury suwuna gözel Awazanyň keşbini kebşirläp oturan Bahry-Hazar arasynda ýaşaýan halkymyzyň agzybirligini, jebisligini şygar edinen beýik akyldar Magtymguly Pyragynyň arzuwlan Berkarar döwleti bu günki gün dünýäde parahatçylygyň we dost-doganlygyň mekanyna öwrüldi. XVIII asyr türkmen durmuşy, taryhy we syýasy wakalar, türkmen topragyna bolan çäksiz söýgi, özüni kemala getiren halka bolan söýgi, durmuşy meseleler, tebigat gözelligi, ahlak arassalygy, söýgi tämizligi… bularyň hemmesi şahyryň döredijiliginde ymykly orun tapýar.
Magtymgulynyň şahyrana dünýäsi giňdir. Şahyr öz döwrüniň ahlagyna, medeniýetine sesini goşupdyr. Emma çeper eseriň ruhy meýdany dörediji şahsyň akyl eleginden çyksa-da, şol bir wagtda onuň şahyranalyk, manylylyk, çeperçilik hörpi millidir, hususydyr hem-de köp taraply we köp ugurlydyr. Magtymgulynyň şahyrana şahsyýetiniň köp öwüşgünliligi, ynsan kalbyny eýeläp bilşi onuň şahyrana dünýäsiniň ynsanyň ýaşyna, kärine, dünýewi ygtykatlaryna seretmezden, olaryň islegini, ruhy hem-de lezzet alyş talabyny ödäp, kanagatlandyryp bilýändiginde jemlenendir.
Magtymguly Pyragy türkmen tebigatynyň aýdymçysydyr, ony ýokary derejede wasp eden şahyrdyr. Magtymguly Pyragynyň döredijiligi umman ýaly giň, ene ýaly mähriban, türkmen halkynyň merdana ogullary ýaly gaýduwsyz.
Altyn GURBANDURDYÝEWA,
Ýagşygeldi Kakaýew adyndaky Halkara nebit we gaz uniwersitetiniň mugallymy.
