Ýaşlaryň medeniýetli, giň düşünjeli, ruhubelent bolup kemala gelmeklerinde kitaphanalaryň, taryhy we ülkäni öwreniş muzeýleriň, teatrlaryň we medeni ojaklaryň hyzmaty uludyr. Diňe bir paýtagtymyzda däl, eýsem welaýatlarymyzdaky we oba ýerlerindäki täze açylan muzeýlerimiz hem-de kitaphanlarymyz ýaşlaryň iň bir gelim-gidimli ýerine öwrüldi.
Danalar kitaplary bilimleriň çeşmesi hasaplaýarlar. Özünde akyl-parasada ýugrulan kitaplar her bir ynsanyň ýakyn dostlary we ýol görkezijisidir. Ýaşlaryň edep-terbiýesine aýratyn üns berýän hormatly Prezidentimiz kitaphanalaryň işini kämilleşdirmek bilen, ýaş nesillerimiziň milli ruhy-ahlak gymmatlyklara sarpa goýmagyny gazanýar. Döwrüň ajaýyp keşbini açyp görkezýän terbiýeçilik ähmiýetli dürli mazmundaky kitaplaryň üstüniň milli Liderimiziň dürdäne paýhasyndan döreýän ajaýyp eserler bilen ýetirilmegi ýaş nesiller üçin bahasyna ýetip bolmajak ruhy hazynadyr.
Her bir halkyň geçmiş taryhyny we şu günki bagtyýar durmuşyny öwrenmekde muzeýlere uly iş degişlidir. Bu ýerde saklanýan baý mazmundaky eksponatlar türkmen halkynyň geçmişde meşhur bolan kesp-kärleri, ýaşaýyş-durmuşlary barada giňden gürrüň berýär. Ekerançylyk, maldarçylyk, ylym-bilim bilen meşgullanan ata-babalarymyzyň örän zähmetsöýer, işjanly bolandygyny bilmek isleseň, muzeýlerdäki dürli zähmet gurallaryny, golýazmalary synlaýmaly. Maldarçylykdan alynýan önümler ösdürilip ýetişdirilýän baldan datly miweler we bakja ekinleri halkymyza şan getiripdir. Saryja goýnuň ýüňünden taýýarlanan nepis halylarymyz türkmen gelin-gyzlarynyň sungat derejesine ýetiren kesp-kärleriniň many-mazmunyny beýan edýär.
Türkmen halkynyň geçmiş durmuşyny suratlandyrýan baý eksponatlary özünde jemleýän muzeýlerimiziň, ynsanyň iň ýakyn dosty we maslahatçysy bolan kitaplaryň öýi bolan kitaphanalarymyzyň nesil terbiýesinde ähmiýeti diýseň uludyr. Diýarymyzyň bu medeni ojaklary ruhy gözelligiň mesgenidir.
Elmira ŞADMANOWA,
Lebap welaýatynyň Çärjew etrabyndaky 24-nji orta mekdebiň taryh mugallymy.
