Berkarar döwletiň täze eýýamynyň Galkynyşy döwri sagdyn durmuş ýörelgeleriniň üstünlikli ornaşdyrylyp, onuň ajaýyp miwesiniň görülýän döwrüdir. Şu ýörelgelerden ugur alyp, paýtagtymyzda we ähli welaýatlarda halkara ölçeglerine laýyk gelýän saglyk merkezleri, hassahanalar hem-de sport desgalary guruldy we bu ugurda ägirt uly işler üstünlikli dowam etdirilýär.
Ýurdumyzda «Saglyk» Döwlet maksatnamasynda bellenilen wezipelere laýyklykda saglygy goraýyş ulgamyny kämilleşdirmek, keselleriň öňüni almagyň we olary bejermegiň täze usullaryny ornaşdyrmak boýunça degişli işler giňden amala aşyrylýar. Döwlet we Milli maksatnamalary amala aşyrmakda, Türkmenistanyň Prezidentiniň ykdysady we özgertmeler syýasatynyň Milli strategiýalaryny durmuşa geçirmekde welaýatymyzyň saglygy goraýyş edaralary hem möhüm işleri durmuşa geçirýärler.
Welaýat merkezimizde sebitde iň uly köpugurly hassahana işleýär. Ähli mümkinçilikleri bolan bu iri saglygy goraýyş merkezinde şu ýylyň dowamynda çylşyrymly operasiýalaryň onlarçasy üstünlikli geçirildi. Merkeziň lukmanlary ýurdumyzyň beýleki sebitlerindäki kärdeşleri bilen onlaýn maslahatlary geçirip, bilelikdäki kämilleşişi üpjün etdiler.
Köpugurly hassahanadan başga-da welaýatymyzda ýokanç keseller hassahanasy, Enäniň we çaganyň saglygyny goraýyş, Gaýragoýulmasyz «Tiz kömek» ýaly merkezler hem iň döwrebap şertlerde ýokary derejede hyzmat edýär. Ýerlerdäki saglyk öýlerinde zähmet çekýän maşgala lukmanlary bolsa, maşgalalaryň ilkinji ýardamçylaryna öwrüldiler. Şeýle-de eneleriň we çagalaryň saglygyny gowulandyrmak üçin «Ene mähri» merkezinde birnäçe işler alnyp barylýar.
Welaýat hassahanalarynda we saglyk öýlerinde lukmançylyk hyzmatyny kämilleşdirmek boýunça çäreleriň tutuş toplumy amala aşyrylýar. Şu ýyl durmuşa geçirilmeli çäreleriň meýilnamasyna salgylanmak bilen welaýatymyzyň saglygy goraýyş işgärleri diňe bir näsaglara hyzmat edilişini gowulandyrmaga däl, eýsem, keselleriň döremeginiň öňüni almaga hem aýratyn üns berýärler.
Welaýatda yzygiderli geçirilip durulýan keselleriň öňüni almakda dogry iýmitlenmegiň, bedenterbiýe we sport bilen meşgullanmagyň, zyýanly endiklerden, şol sanda çilim çekmek endiginden gaça durmagyň ähmiýeti dogrusynda wagyz edýän dürli çäreler geçirilýär. Bu ugurda hormatly Prezidentimiziň alyp barýan işleri, teklipleri, başlangyçlary biziň üçin şahsy göreldedir.
Maýsa KÖRPÄÝEWA,
Türkmenabat şäherindäki 5-nji saglyk öýüniň baş lukmanynyň orunbasary.
