Sanly ykdysadyýetiň hereket etmegi jemgyýetiň, işewürligiň we döwletiň bir wagtda sanly ykdysadyýete geçmegini şertlendirýär. Sanly ykdysadyýetiň ösüşi oňa gatnaşyjylaryň özara hyzmatdaşlygynyň ähli derejelerinde sanly gatnaşyklary ýola goýmak işiniň çaltlandyrylmagy bilen bagly bolup durýar.
Türkmenistanda sanly ykdysadyýeti ösdürmek boýunça «Türkmenaragatnaşyk» agentliginiň utgaşdyrmagynda edaralaryň, kärhanalaryň we guramalaryň her birinde maglumatlary saklaýan, gaýtadan işleýän serwer we ulgam enjamlarynyň bir bitewi ulgama birleşdirilmegini üpjün edýän täze innowasion tehnologiýalar ornaşdyrylýar. Önümçilik pudaklaryny awtomatlaşdyrmak, hasaba alyş we buhgalter hasabatyny ýönekeýleşdirmek, elektron hyzmatlar ulgamyny ösdürmek maksady bilen, Türkmenistanyň bir bitewi Döwlet hyzmatlary hem-de işler portaly e.gov.tm döredildi. Bu portal raýatlar hem-de işewürlik üçin elektron görnüşinde döwlet hyzmatlaryny ýerine ýetirmäge «Bir penjire» diýen awtomatlaşdyrylan maglumat ulgamy hökmündedir. «Bir penjire» ýörelgesi hyzmatlardan peýdalanmak üçin ýüz tutýandan resminamalaryň merkezleşdirilen görnüşde kabul edilmegini, şeýle hem resminamalary taýýarlamagyň möhletiniň berjaý edilişine hem-de olaryň berilmegine gözegçiligi üpjün etmegi amala aşyrmaga mümkinçilik berýär.
Ýakynda bolsa biziň Telekommunikasiýalar we informatika institutymyzda ýurdumyzyň howpsuz sanly ulgama geçmegi babatda alnyp barylýan möhüm taslama — maglumat goraglylygyny üpjün etmek maksady bilen döredilen Kiberhowpsuzlyk boýunça öňdebaryjy tejribeler merkezi açyldy. Merkez ýurdumyzyň ähli pudaklaryna sanly ulgamyň ornaşdyrylmagy bilen baglanyşykly alnyp barylýan işlere goldaw bolar.
Amandurdy AMANDURDYÝEW,
Türkmenistanyň Telekommunikasiýalar we informatika institutynyň 3-nji ýyl talyby.
