Ýurdumyzda milli ykdysadyýetiň ähli pudaklaryny okgunly ösdürmäge, halkymyzyň durmuş derejesini yzygiderli gowulandyrmaga, ählumumy parahatçylygyň we abadançylygyň bähbidine hoşniýetli goňşuçylyk gatnaşyklaryny pugtalandyrmaga gönükdirilen döwlet syýasaty rowaçlyklara beslenýär. 7-nji fewralda Diýarymyzda 2024-nji ýylda alnyp barlan işleriň jemini jemlemäge bagyşlanyp geçirilen Ministrler Kabinetiniň giňişleýin mejlisinde berlen hasabatlarda beýan edilen maglumatlar hem munuň şeýledigini nobatdaky gezek tassyklaýar.
Ata Watanymyzyň halkara abraýynyň pugtalandyrylmagy ýurdumyzda amala aşyrylýan durmuş ugurly döwlet syýasatynyň özenini düzdi. Halkyň beýik ynamy ýagty geljegiň gözbaşydyr. «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynyň» esasynda ýurdumyzyň dürli künjeklerinde toplumlaýyn işler amala aşyrylýar. Hormatly Prezidentimiziň ýurdumyzyň ykdysadyýetiniň pudaklarynda 2024-nji ýylda alnyp barlan işleriň jemlerine bagyşlap geçiren Ministrler Kabinetiniň giňişleýin mejlisinde kabul edilen çözgütler we kesgitlenen wezipeler munuň şeýledigine nobatdaky gezek şaýatlyk etdi.
Hasabatlardan görnüşi ýaly, geçen ýylda jemi içerki önümiň ösüşi 6,3 göterime deň boldy. Maýa goýumlar 9,1 göterim artyp, jemi 5 müň 735 sany täze iş orny döredildi. Ýurdumyzda öndürilen önümleriň eksport edilen möçberi 12 milliard amerikan dollaryndan geçdi. “Pähim-paýhas ummany Magtymguly Pyragy” ýylynda maliýeleşdirmegiň ähli çeşmeleriniň hasabyna 86 sany önümçilik we medeni-durmuş maksatly desga, umumy meýdany 1 million 145 müň inedördül metre deň bolan ýaşaýyş jaýlary ulanmaga berildi. Ýurdumyzyň iri we orta kärhanalarynda ortaça aýlyk zähmet haky, 2023-nji ýyl bilen deňeşdirilende, 10,6 göterim ýokarlandy. Zähmet haklary, pensiýalar, döwlet kömek pullary, talyp haklary öz wagtynda maliýeleşdirildi. Senagat, gurluşyk, ýangyç-energetika, söwda, ulag-aragatnaşyk, oba hojalyk pudaklarynda bellenen meýilnamalar doly ýerine ýetirilip, oňyn ösüş görkezijileri üpjün edildi.
Hormatly Prezidentimiziň «Türkmenistany 2025-nji ýylda durmuş-ykdysady taýdan ösdürmegiň we maýa goýum Maksatnamasyny tassyklamak hakynda» Karara gol çekmegi uly jemgyýetçilik seslenmesini döretdi. «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynyň» hem-de «Halkara parahatçylyk we ynanyşmak ýyly» şygary astynda geçýän şanly ýyl üçin Döwlet býujetiniň esasynda taýýarlanylan bu resminamada 2025-nji ýylda ýetilmeli makroykdysady görkezijileriň, ykdysadyýetiň ähli pudaklary boýunça önümçilik meýilnamalarynyň, şeýle-de raýatlaryň ýaşaýyş-durmuş derejesini has-da gowulandyrmak bilen bagly çäreleriň öz beýanyny tapýandygy guwandyryjydyr.
Il-halkymyz bilen jebislikde, agzybirlikde külterlenen şanly menziller hormatly Prezidentimiziň beýik işleri bilen şöhratlanýar. Bu gün Watanymyz rowaçlyklaryň, gülläp ösüşleriň mekanyna öwrüldi. Bu döwletli döwran Gahryman Arkadagymyzyň başyny başlan döwletlilik ýörelgesiniň dowamata atarylýan eýýamydyr. Bu ajaýyp döwür Arkadagly Gahryman Serdarymyzyň baştutanlygynda gülläp ösüşiň hem-de beýik ýeňişleriň şöhratlanýan zamanasydyr. Munuň üçin agzybir halkymyzyň hormatly Prezidentimize alkyşlary çäksizdir.
Şasenem AŞYRBERDIÝEWA,
S.A.Nyýazow adyndaky Türkmen oba hojalyk uniwersitetiniň mugallymy.
