Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda ýurdumyzda halkymyzyň saglygy ugrunda ägirt uly işler durmuşa geçirilýär. Munuň şeýledigine hormatly Prezidentimiz Serdar Berdimuhamedowyň şu ýylyň dokuz aýynda ykdysadyýetimiziň pudaklarynda alnyp barlan işleriň jemlerine bagyşlanyp, sanly ulgam arkaly geçiren Ministrler Kabinetiniň nobatdaky mejlisiniň dowamynda Türkmenistanda fiziologiýa ylmyny ösdürmegiň 2024 — 2028-nji ýyllar üçin Milli maksatnamasyny; Türkmenistanda lukmançylyk sagaldyş-dikeldiş çäreleriniň 2024 — 2028-nji ýyllar üçin Milli strategiýasyny; Türkmenistanyň immuno-öňüni alyş boýunça 2024 — 2028-nji ýyllar üçin Milli maksatnamasyny tassyklamak; Ilatyň derman serişdeleri we lukmançylyk maksatlaryna niýetlenen önümler bilen üpjün edilmegini kämilleşdirmek; Halkara sagaldyş-dikeldiş merkezini; Halkara fiziologiýa ylmy-kliniki merkezini döretmek; Balkan, Lebap we Mary welaýatlarynda onkologiýa hassahanalarynyň gurluşygynyň taslamalaryny maliýeleşdirmek hakynda Kararlara gol çekmegi hem aýdyň subut etmek bilen, biziň her birimizde buýsanç duýgusyny döretdi.
Gahryman Arkadagymyzyň, Arkadagly Gahryman Serdarymyzyň taýsyz tagallalary netijesinde, ýurdumyzy syýasy, ykdysady hem-de medeni taýdan ösdürmek, halkymyzyň ýaşaýyş-durmuş derejesini has-da ýokarlandyrmak bilen birlikde, ýurdumyzda saglygy goraýyş ulgamyny ösdürmek, döwrebaplaşdyrmak, ony dünýä ülňülerine laýyk getirmekde hem ägirt uly işler amala aşyrylýar. Bu günki gün ýurdumyzyň raýatlary dünýä ülňülerine laýyklykda gurlup, iň kämil enjamlar bilen enjamlaşdyrylan häzirki zaman saglyk merkezlerinde ýokary derejeli lukmançylyk kömegini alýarlar.
Ynsan saglygyny goramak döwlet syýasatynyň aýrylmaz bölegine öwrüldi. Dünýä ülňülerine laýyk gelýän halkara saglyk merkezleri diňe bir paýtagtymyzda däl-de, ähli welaýatlarda saglyk öýleri, hassahanalar, «Ene mähri» merkezi, derman öndürýän kärhanalar hem-de saglygy goraýyş merkezleriniň ençemesi gurlup, halkymyza ulanmaga berildi. Eziz Diýarymyzyň dürli künjeklerinde ýerleşýän melhem suwly çeşmeleriň başynda döwrebap gurlan şypahanalar dünýäniň häzirki zaman lukmançylyk enjamlary bilen üpjün edildi.
«Saglyk» Döwlet maksatnamasynyň çäklerinde ýurdumyzda bedenterbiýäni, sporty ösdürmek, saglygy goraýyş edaralarynyň maddy-enjamlaýyn üpjünçiligini has-da berkitmek, daşky gurşawy, tebigaty goramak, maşgala lukmançylygyny kämilleşdirmek, ýokanç we ýokanç däl keselleriň öňüni almak, arassaçylyk tertip-düzgünleri pugtalandyrmak, sagdyn durmuşy ornaşdyrmak babatynda giň gerimli işler alnyp barylýar. Bütindünýä Saglygy Goraýyş Guramasy tarapyndan ýurdumyza gowşurylan güwänamalar hem döwletimiziň saglygy goraýyş ulgamyndaky özgertmeleriniň, halkymyzyň saglygyny goramakdaky ýola goýlan işleriň ykrarnamasydyr. Gahryman Arkadagymyz Watanymyzyň geljegi bolan ýaş nesliň saglygyny goramakda hemmetaraplaýyn alada edilýändigi barada aýratyn belleýär. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmegi netijesinde hem ýurdumyzda ençeme ynsanperwer işler ýerine ýetirilýär.
Il-ýurt bähbitli ajaýyp ynsanperwer işleri amala aşyrýan Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!
Hudaýnazar ÖWEZOW,
Myrat Garryýew adyndaky Türkmenistanyň Döwlet lukmançylyk uniwersitetiniň Harby meýdan hirurgiýasy kafedrasynyň mugallymy.
