Häzirki wagtda bütin dünýäde sanly ulgamyň gazananlarynyň, innowasion tehnologiýalaryň ykdysadyýetiň dürli pudaklaryna ornaşdyrylyşynyň depgini ýokarlanýar. Täzeçil çemeleşmeler, awtomatlaşdyrylan gurluşlar, kämil innowasiýalar dürli ugurlarda ýüze çykýan meseleleri üstünlikli çözmäge ýardam edýär. Türkmenistanda hem innowasion tehnologiýalar ulgamynda netijeli taslamalaryň durmuşa geçirilmegine, robot, emeli aň tehnologiýalaryny işläp taýýarlamaga, ykdysadyýete sanly ulgamy ornaşdyrmaga döwlet derejesinde uly üns berilýär.
Ýakynda paýtagtymyz Aşgabatda Türkmenistanyň maýa goýum forumynyň hem-de ugurdaş serginiň çäklerinde Türkmenistanyň Ylymlar akademiýasynyň Halkara ylmy-tehnologiýa parkynda «HI-TECH Türkmenistan — 2024» atly halkara maslahatyň we serginiň geçirilmegi Berkarar döwletiň täze eýýamynyň Galkynyşy döwründe döredijilik, ykdysady ösüş, abadançylyk ýoly bilen ynamly öňe barýan Watanymyzyň üstünliklerini açyp görkezmäge hem-de degişli ugurda halkara hyzmatdaşlygy ösdürmäge giň mümkinçilikleri açdy. Dünýäniň öňdebaryjy kompaniýalarynyň wekillerini, ugurdaş ýokary okuw mekdepleriniň talyplaryny hem-de ýaş telekeçileri bir ýere jemlän forum tejribe alyşmak, täze hyzmatdaşlary tapmak, innowasion tehnologiýalardyr çözgütler bilen tanyşmak üçin ajaýyp mümkinçilikleriň meýdançasyna öwrüldi.
Suw tygşytlaýjy tehnologiýalar, maliýe tehnologiýalary, bilim tehnologiýalary, senagat, elektron söwda, ekologiýa we durnukly ösüş, lukmançylyk we biotehnologiýa, «akylly» şäher we gurluşyk, ulag we logistika, oba hojalygynyň tehnologiýalary, gaýtadan dikeldilýän energiýa çeşmeleri, maglumat tehnologiýalary we sanly geçiş ýaly ugurlara bagyşlanan maslahatlar, şeýle hem programma üpjünçiliginiň işläp taýýarlamalaryna, maglumat tehnologiýalary hyzmatlaryna, işewürlik hem-de döwlet edaralary üçin programma çözgütlerine bagyşlanan diwarlyklar özara tejribe alyşmakda möhüm ähmiýete eýe boldy.
Türkmenistan sanly özgertmeleriň, ähli ulgamlara innowasiýalary çekmegiň işjeň tarapdary bolmak bilen, ýurdumyzda iň gowy dünýä tejribelerini öwrenmäge hem-de özleşdirmäge uly ähmiýet berilýär. Hut şonuň üçin-de soňky ýyllarda kabul edilen döwlet maksatnamalarynda tutuş ýurdumyzda internete elýeterliligiň giňeldilmegine, öýjükli aragatnaşygyň hiliniň gowulandyrylmagyna uly üns berilýär. Munuň özi sanly hyzmatlaryň hilini ýokarlandyrmaga, sanly ykdysadyýeti ösdürmek üçin şertleri döretmäge gönükdirilendir.
Häzirki zaman ylmy-tehniki gazanylanlar, bilimler we innowasiýalar ýurdumyzyň mundan beýläk-de gülläp ösmeginiň, milli ykdysadyýeti döwrebaplaşdyrmagyň, ähli ulgamlarda öňegidişligiň, dünýäniň syýasy, ykdysady, ylmy-medeni giňişliginde eýeleýän ornuny pugtalandyrmagyň ygtybarly binýadydyr.
Aýjahan OTYZOWA,
Türkmenistanyň Oguz han adyndaky Inžener-tehnologiýalar uniwersitetiniň Kompýuter ylymlary we maglumat tehnologiýalary fakultetiniň Maglumat ulgamlary we tehnologiýalary taýýarlygy ugrunyň 2-nji ýyl talyby.
