Erkinligiň goýnunda ýaýnaýan bagtyýar halkymyz Gahryman Arkadagymyz hem-de Arkadagly Gahryman Serdarymyz tarapyndan döwlet hem jemgyýetçilik durmuşynyň ähli ugurlarynda amala aşyrylýan giň gerimli özgertmeleriň ýokary depginde alnyp barylýandygynyň şaýady bolup, il-ýurt bähbitli işlerde päk ýürekden zähmet çekip, öz mynasyp goşandyny goşýar.
Şeýle ajaýyp özgertmeleriň biri-de ýurdumyzyň saglygy goraýyş ulgamynda geçirilen we geçirilýän beýik işlerdir. Garaşsyzlyk ýyllary içinde bu ugurda gurlan binalar «sanasaň sogaby bar» diýleni. Keselleriň öňüni almakda bu döwrebap saglyk merkezleriniň we hassahanalaryň ähmiýeti örän uludyr. Ýurdumyzyň islendik raýaty öz saglyk ýagdaýyny barlatmak bilen, kesele ýolugmanka öňünden bejergi alýar. Şonuň netijesinde bolsa halkymyzyň ömür dowamaty uzaýar.
Ýurdumyzda saglyk ulgamynda hormatly Prezidentimiziň «Saglyk» Döwlet maksatnamasyna laýyklykda, daşary döwletleriň lukmançylyk merkezleri bilen berk hyzmatdaşlygyň ýola goýulmagy netijesinde milli saglygy goraýşyň özboluşly ugry döredildi. Milli maksatnamalar hem-de meýilnamalar esasynda alnyp barylýan işler halkara hyzmatdaşlygyny berkitmekde, ylaýta-da, BMG-niň ýöriteleşdirilen düzümi bolan Bütindünýä Saglygy Goraýyş Guramasy bilen gatnaşyklary yzygiderli ösdürmekde uly ähmiýete eýedir.
Ýaş nesli sagdyn terbiýelemegiň möhüm şert bolup durýandygy hemmelere mälimdir. Gahryman Arkadagymyzyň başlangyjy bilen döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy bu ugurda uly işleri amala aşyrýar. Gaznanyň hasabyna ýurdumyzyň welaýatlarynyň etrap we şäher hassahanalaryna döwrebap «Tiz kömek» awtoulaglary, saglygy goraýyş enjamlary, paýtagtymyzyň we welaýatlarymyzyň degişli saglygy goraýyş düzümlerine Germaniýanyň «B.Braun» öndürijisiniň «Dialog+» kysymly emeli böwrek enjamy sowgat berildi.
Soňky ýyllarda ýurdumyzyň saglygy goraýyş ulgamyna aýratyn üns berilýär. Dürli ugurlarda keselleri bejermegiň döwrebap usullaryny özünde jemleýän saglygy goraýyş binalary gurlup ulanylmaga berilýär. Ýurdumyzda derman senagatyny ösdürmäge hem uly ähmiýet berilýär. Keselleriň öňüni almak, anyklamak we bejermek boýunça öňdebaryjy tejribeler giňden ornaşdyrylýar. Paýtagtymyzda Halkara pediatriýa, Halkara onkologiýa ylmy-kliniki merkezleriniň we Stomatologiýa merkeziniň düýbüniň tutulmagy döwletimizde bagtyýar halkymyzyň saglygy ugrunda düýpli alada edilip, uly işleriň amala aşyrylýandygyna aýdyň güwä geçýär. Şeýle beýik işleriň halkara derejesinde, ösen lukmançylyk ylmy esasynda alnyp barylýandygy bolsa, tutuş halkymyzy buýsandyrýar.
Dilber KURBANOWA,
Türkmenabadyň lukmançylyk orta okuw mekdebiniň mugallymy.
