Köne döwrüň alymlary kitaby Jemşidiň jamyna meňzedipdirler. Dogrudan hem, kitap içi täsin maglumatlardan doly bilim hazynasydyr. Parasatly halkymyz ony akyl-paýhasyň jemlenen mirasy hasaplapdyr.
Mälim bolşy ýaly, gadymy döwürlerde türkmenleriň döreden köp sanly döwletlerinde hemişe ylma, edebiýata, sungata aýratyn üns berlipdir. Biziň ata-babalarymyz hem gadymy döwürlerden başlap kitaba uly hormat goýup, ony aýawly saklap gelipdirler. Beýik Seljuklar zamanynda we ondan hem irräkki döwürlerde Köneürgenç, Merw ýaly şäherlerde dünýäniň iň uly kitaphanalary işläpdir. Olar ýokary wezipeli döwlet adamlarynyň, begdir begzadalaryň, alymlaryň, din adamlarynyň hemaýat etmegi netijesinde gurlupdyrlar. Bu kitaphanalaryň baý genji-hazynalaryndan ýerli we daşary ýurtly alymlar özleriniň ylmy işlerini ýazanlarynda giňden peýdalanypdyrlar.
Beýik Ýüpek ýolunyň möhüm çatrygynda, Amyderýanyň kenarynda ýerleşen gadymy Amul topragy hem medeniýetiň pajarlap ösen ýeri, belli alymlaryň, ýazyjy-şahyrlaryň, öz döwründe halkyna, Watanyna halal hyzmaty bilen tanalan adamlaryň mekany hökmünde mälimdir. Şeýle bolansoň, gadymy Lebap topragynda gadymy döwürlerden tä biziň günlerimize çenli meşhur taryhy-edebi eserleriň ençemesi döräpdir. Olar halkymyzyň ruhy-medeni gymmatlyklary hökmünde halkymyzyň hakydasyna siňendir.
Bu taryhy maglumatlar türkmen halkynyň kitaby we golýazmalary ynsan ruhunyň hazynasy, paýhas çeşmesi, umumadamzat hakydasynyň aýrylmaz bölegi hökmünde aýawly saklamak däbiniň asyrlaryň jümmüşinden gaýdýandygyny äşgär edýär. Häzirki zaman maglumat jemgyýeti hem milletiň medeni-ruhy gymmatlyklaryny saklamakda durmuşyň ähli ulgamlarynda talap edilýän bilimiň kemala gelmegini we toplanmagyny şertlendirýän ykdysadyýeti, ylmy, tehnikany we bilimi ösdürýän ulgamda möhüm orun eýeleýän kitaphanalaryň işini guramaga bolan täzeçil çemeleşmeleri talap edýär.
Ylym-bilime, raýatlaryň intellektual mümkinçiliklerine, ruhy-medeni mirasyň öwrenilmegine, ynsan kalbynyň şamçyragy hasaplanýan kitaplara ýaş nesliň kalbynda söýgini hem hormaty döredip bilýän ýurduň geljegi rowanadyr.
Dursunjemal SEÝIDOWA,
Çärjew etrabynyň Merkezi kitaphanasynyň kitaphanaçysy.
