Türkmen halkynyň Milli Lideri Gahryman Arkadagymyz «Sport — sagdynlyk, sport — gözellik, sport bir söz bilen aýdanyňda ýaşaýyşdyr» diýip belleýär. Bu çuň manyly jümlede sportuň ähmiýeti, onuň adam durmuşyna ýetirýän oňyn täsiri öz beýanyny tapýar. Şonuň bilen baglylykda, häzirki döwürde ýurdumyzyň ähli künjeklerinde sportuň hem-de köpçülikleýin bedenterbiýäniň ösdürilmegi, sagdyn durmuş ýörelgeleriniň durmuşa ornaşdyrylmagy ulus-ilimizde gyzgyn goldaw tapýar.
Bilşimiz ýaly, «Pähim-paýhas ummany Magtymguly Pyragy» ýylynda ildeşlerimiziň dürli sport ýaryşlarynda gazanýan üstünlikleri buýsançly duýgulary döredýär. Şu ýylyň başyndan bäri türgenlerimiziň dünýä ýurtlarynda guralan dürli derejedäki ýaryşlarda mynasyp bolan medallarynyň sany onlarçadyr. Geçen aýda paýtagtymyzdaky Gyşky oýunlar sport toplumynda geçirilen hokkeý boýunça halkara ýaryşda ýurdumyzyň «Galkan» hokkeý topary gazanan ajaýyp üstünligi bilen ulus-ilimizi begendirdi. «Pähim-paýhas ummany Magtymguly Pyragynyň» ýylynyň şanly günlerinde türgenlerimiziň gazanan bu üstünligi Gahryman Arkadagymyzyň başyny başlan beýik başlangyçlaryny mynasyp dowam etdirýän Arkadagly Gahryman Serdarymyzyň sport ulgamynda durmuşa geçirýän syýasatynyň barha rowaçlyga beslenýändiginiň subutnamasy bolup dabaralandy.
Geçen ýyllarda paýtagtymyzda Ýapyk binalarda we söweş sungaty boýunça V Aziýa oýunlarynyň, Agyr atletika hem-de Kuraş boýunça dünýä çempionatlarynyň, sebitleýin halkara sport bäsleşikleriniň üstünlikli geçirilendigini hem bellemek juda ýakymlydyr. Hokkeý boýunça halkara ýaryş bolsa, şol abraýly sport çäreleriniň üstüni ýetirmek bilen, türkmen sportunyň beýik ösüşlerini dünýä äşgär etdi. Bu zatlar hormatly Prezidentimiziň türkmen sportuny ösdürmek we onuň halkara abraýyny belende götermek, sportuň ösen milli ulgamyny döretmek, ilatyň saglygyny pugtalandyrmak, şeýle-de halkara sport hyzmatdaşlygyny pugtalandyrmak ugrunda edýän tagallalaryndan gözbaş alýar.
Sport sagdynlygyň gözbaşydyr. Sporty özüne hemra edinýän ildeşlerimiziň sanynyň barha artmagy, türgenlerimiziň dürli derejedäki ýaryşlarda üstünlikli çykyş etmegi, ak mermerli paýtagtymyzda dürli görnüşli sport oýunlarynyň yzygiderli geçirilmegi Türkmenistanyň sagdynlygyň, ruhubelentligiň we sportuň mekany hökmündäki ornuny barha pugtalandyrýar. Bu gün sagdyn durmuş ýörelgelerine eýermekde her birimize nusgalyk görelde bolýan, türkmen sportuny ösdürmekde taýsyz tagallalary edýän Gahryman Arkadagymyza hem-de Arkadagly Gahryman Serdarymyza alkyşlarymyz çäksizdir.
Allak ALLAKOW,
Tejen etrabynyň Altyn asyr şäheriniň sport mekdebiniň müdiri.
