Mukaddes Garaşsyzlygymyzyň 33 ýyllygynyň baýramynyň bellenilýän ýyly bolan “Pähim-paýhas ummany Magtymguly Pyragy” ýylynda Arkadagly Gahryman Serdarymyzyň baştutanlygynda ýurdumyzyň halk hojalygynyň esasy pudaklarynyň biri bolan obasenagat toplumy-da uly ösüş-özgerişleri başdan geçirip, belent sepgitleri eýeleýärler. Döwletimiz tarapyndan döredilýän amatly şertlerden ýerlikli peýdalanýan oba hojalyk pudagynyň zähmetsöýer işgärleri sahawata beslenen ene topragymyzdan bereketli hasyl öndürmekde ýokary görkezijilere eýe bolýarlar.
Häzirki günlerde Halaç etrabynyň tutanýerli daýhanlary hormatly Prezidentimiziň özleri üçin döredýän mümkinçiliklerinden netijeli peýdalanyp, gowaça ekilen meýdanlarda gögeriş suwuny tutmak, gögeriş alnan meýdanlarda hatarara bejergi, ýekeleme, otag etmek işlerini gyzgalaňly alyp barýarlar. Bu işleri geçirmekde daýhanyň daýanjy bolan oba hojalyk tehnikalaryndan ýerlikli peýdalanýarlar. Bugdaý ekilen meýdanlarda bolsa agrotehniki kadalara görä ideg etmek, ösüş suwuny tutmak işleri dowam etdirilýär. Barha ýakynlaşýan galla oragy möwsüminde işledilmegi meýilleşdirilýän galla kabul ediş kärhanalaryny, elewatorlary we bugdaý ýygýan kombaýnlary taýýarlamak boýunça işler guramaçylykly alnyp barylýar.
Etrabymyzda ýeralmanyň, beýleki gök-bakja ekinleriniň öndürilýän möçberini artdyrmak, azyk bolçulygyny döredip, bu önümler bilen ilaty yzygiderli üpjün etmek boýunça meýilnama laýyklykda degerli işler durmuşa geçirilýär. Şu günler etrabymyyzň ekerançylyk meýdanlarynda ýazlyk gök-bakja ekinlere agrotehnikanyň talaplaryna görä ideg etmek işleri gyzgalaňly häsiýete eýe. Şeýle-de, güýzlük ekinleriň hasylyny ýygnamak, ilata terligine ýetirmek boýunça işler gyzgalaňly alnyp barylýar.
Etrabymyzyň pileçileri tarapyndan ýüpekçiligi ösdürmek boýunça hem netijeli işler bitirilýär. Ýüpek gurçugyna ideg etmek we ýetişdirilen pile hasylyny Watan harmanyna tabşyrmak boýunça talabalaýyk işler geçirildi.
Hormatly Prezidentimiziň oba hojalyk pudagyny ösdürmek boýunça kabul edýän kararlarynyň durmuşa geçirilmegi önüm öndürijilere has hem netijeli işlemäge şert döredip, önüm bolçulygyny döretmäge, azyk howpsuzlygyny üpjün etmäge mümkinçilik berýär.
Batyrguly ÖWLÝAGULYÝEW,
Türkmenistanyň Agrar partiýasynyň Halaç etrap komitetiniň başlygy.
