Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda giň sport hyzmatdaşlygyny alyp barýan Türkmenistan sport arkaly halklary parahatçylyga, agzybirlige, ösüşe çagyrýar. Diýarymyzda häzirki wagtda sportuň dürli görnüşleri uly üstünliklere eýe bolup, olar bilen meşgullanýan ýaşlaryň sany barha artýar.
Ýurdumyzda sportuň tennis görnüşini ösdürmek hem-de wagyz etmek boýunça toplumlaýyn ulgamy döretmegiň, uzak geljege gönükdirilen beýik işleriň halkara derejede ykrar edilmeginiň nyşany hökmünde golaýda hormatly Prezidentimize Halkara tennis federasiýasynyň güwänamasynyň gowşurylmagy halkymyzy buýsandyrdy. Ýurdumyzda geçirilen halkara ýaryşlarda ýokary üstünlikleri gazanan türgenleriň we tälimçileriň döwlet derejesinde sylaglanylyp, olara hormatly atlaryň dakylmagy, döwlet Baştutanymyzyň türkmen ýaşlarynyň durmuşyna, ykbalyna, ähli ugurlarda gazanýan üstünliklerine bagyşlap döreden «Ýaşlar — Watanyň daýanjy» atly kitabynda türkmen sportunyň ösüşlerine aýratyn orun bermegi, ýurdumyzyň 2023 — 2027-nji ýyllar üçin ÝUNESKO-nyň Bedenterbiýe we sport boýunça hökümetara komitetiniň agzalygyna biragyzdan saýlanylmagy, sportuň innowasion görnüşlerini ornaşdyrmak, ösdürmek boýunça işleriň yzygiderli alnyp barylmagy türkmen sportunyň täze ösüşlerini dünýä äşgär edýär. «Pähim-paýhas ummany Magtymguly Pyragy» ýylynda hokkeý boýunça halkara ýaryşy, 2025-nji ýylda Sambo boýunça dünýä çempionatyny geçirmek barada kabul edilen çözgütler, şeýle hem geçen ýylyň noýabrynda Olimpiýa şäherçesiniň Başa-baş söweş sungaty sport toplumynda Kuraş boýunça XIV dünýä çempionatynyň üstünlikli guralmagy iri halkara sport ýaryşlaryny geçirmäge ukyply ýurt hökmünde ykrar edilen Türkmenistanyň dünýä derejesindäki abraýyny has-da artdyrýar.
Geçen ýylyň iýun aýynda paýtagtymyz 12 ýaşa çenli ýetginjek oglan-gyzlaryň arasynda tennis boýunça Merkezi Aziýa ýurtlarynyň toparlaýyn ýaryşynyň ikinji gezek geçirilen ýeri boldy. Onda alty ýurduň — Türkmenistanyň, Owganystanyň, Gazagystanyň, Gyrgyzystanyň, Özbegistanyň we Täjigistanyň ýaş türgenleri bäsleşdiler. Bularyň ählisi Berkarar döwletiň täze eýýamynyň Galkynyşy döwründe Garaşsyz Diýarymyzda sporty ösdürmäge, hemmetaraplaýyn sagdyn ýaş nesli terbiýelemäge, bu ugurda halkara hyzmatdaşlygy pugtalandyrmaga gönükdirilen toplumlaýyn işleriň alnyp barylýandygyna şaýatlyk edýär.
Bedenterbiýäni we sporty ösdürmek üçin ähli mümkinçilikleri bolan Arkadag şäherinde 2023-nji ýylda futbol toparynyň döredilmegi ýurdumyzyň sport durmuşynda möhüm ähmiýetli waka boldy. Eýýäm ilkinji ýyldan “Arkadag” futbol toparynyň Türkmenistanyň çempionatynda üstünlikli çykyş etmegi, şeýle hem Türkmenistanyň Kubogyna eýe bolmagy onuň geljeginiň uludygyny görkezýär.
Berk bedenli, sagdyn ruhly, döwrebap bilimli nesilleri terbiýeläp ýetişdirmek, bedenterbiýäni we sporty ösdürmek babatda giň mümkinçilikleri döredýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, belent başlary aman bolsun, il-ýurt bähbitli, döwlet ähmiýetli işleri hemişe rowaçlyklara beslensin!
Muhammetmurat NARMEDOW,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
