Ýaponiýa bilen köpugurly, uzak möhletli strategik hyzmatdaşlygy berkitmek Türkmenistanyň daşary syýasatynyň ileri tutulýan ugurlarynyň biri bolmagynda galýar. Bilim ulgamynda hyzmatdaşlyk etmek babatda eýýäm bilelikde uly işler durmuşa geçirildi, şol bir wagtyň özünde, bu gatnaşyklary ösdürmek üçin uly mümkinçilikler bar.
Häzirki wagtda Türkmenistan bilen Ýaponiýanyň arasyndaky ylym-bilim babatyndaky hyzmatdaşlygyň gerimi barha giňeýär. Munuň şeýledigine iki ýurduň bilim pudagynda barlaglary geçirmekde özara alyş-çalyş etmek boýunça halkara okuw maksatnamasyna beren ýardamy üçin Gahryman Arkadagymyza Ýaponiýanyň Sukuba uniwersitetiniň «Hormatly doktory» diýen ylmy adyň berilmegi aýdyň şaýatlyk edýär.
Özara ylalaşygyň netijesinde geçen ýyllaryň dowamynda ýaponiýaly mugallymlaryň we talyplaryň birnäçesi türkmen we rus dillerini öwrendiler, şeýle-de türkmen ýaşlaryna ýapon dilini öwretmek işine goşant goşdular. Türkmenistanly ýaş mugallymlardyr talyplar Sukuba uniwersitetinde okuwda bolup, ýapon dili boýunça bilimlerini has çuňlaşdyrýarlar.
2022-nji ýylyň fewral aýynda ýapon dilini öwrenmek üçin enjamlary gowşurmak boýunça şertnama gol çekmeklik dabarasy boldy. Ýaponiýanyň türkmen talyplary bilen dostlukly gatnaşyklary berkitmek boýunça «MIRAI» maksatnamasynyň çäklerinde türkmen ýaşlary eýýäm birnäçe gezek Ýaponiýada okuw saparlarynda boldular.
Türkmenistanyň Oguz han adyndaky Inžener-tehnologiýalar uniwesitetiniň agzybir professor-mugallymlarynyň tagallasy bilen talyplaryň daşary ýurt dillerini has kämil derejede öwrenmekleri üçin dürli usullardan netijeli peýdalanylýar. Şol maksat bilen dil öwreniji, pikirleniş ukyplaryny ösdüriji dil bäsleşikleri, hepdelikleri guralyp durulýar. Bu abraýly ýokary okuw mekdebinde türkmen, rus, iňlis dilleri bilen bir hatarda, ýapon diliniň hem kämil derejede öwredilmegi talyplarda uly gyzyklanma döredýär.
Türkmenistan bilen Ýaponiýanyň arasyndaky dostlukly gatnaşyklar ýyl geçdigiçe barha berkäp, röwşen geljegi nazarlaýar. Munuň özi hormatly Prezidentimiziň parasatly baştutanlygynda Garaşsyz Türkmenistanyň dünýä syýasy ummanynda dogry ýol bilen ösüşiň hem bagtyýarlygyň ýolunda ynamly öňe barýandygynyň ýene-de bir subutnamasydyr.
Ogulmeret ORAZMÄMMEDOWA,
Türkmenistanyň Oguz han adyndaky Inžener-tehnologiýalar uniwersitetiniň talyby.
