Hormatly Prezidentimiz 9-njy fewralda geçirilen Türkmenistanyň Ministler Kabinetiniň giňişleýin mejlisinde ýurduň oba hojalyk pudagynda düýpli özgertmeleri durmuşa geçirmek, täzeçe iş usullaryny önümçilige ornaşdyrmak, pudagy ösdürmegiň ygtybarly ösüşini has-da belent derejelere götermek, daýhanlary höweslendirmek maksady bilen möhüm resminamalara gol çekdi. Şoňa laýyklykda, pagtanyň we gallanyň döwlet satyn alyş bahalary hem ýokarlandyryldy.
Anyk maglumata ýüzlensek, şu ýylyň hasylyndan başlap bugdaýyň bir tonnasynyň döwlet satyn alyş bahasy 2 müň manat möçberde bellenildi. Şeýle hem nah pagtanyň bir tonnasy üçin döwlet satyn alyş bahalary ýygymyň başlanýan gününden 15-nji oktýabra çenli 5 müň manat, 15-nji oktýabrdan 15-nji noýabra çenli 4 müň 770 manat, 15-nji noýabrdan ýygymyň tamamlanýan gününe çenli 4 müň 550 manat möçberde bolar. Ýüpek pagtanyň bir tonnasy üçin bolsa döwlet satyn alyş bahalary ýygymyň başlanýan gününden 15-nji oktýabra çenli 6 müň 700 manat, 15-nji oktýabrdan 15-nji noýabra çenli 6 müň 400 manat, 15-nji noýabrdan ýygymyň tamamlanýan gününe çenli 6 müň 100 manat möçberde kesgitlenildi. Munuň özi ähli oba hojalyk işgärleriniň, zähmetkeş daýhanlarymyzyň buýsanjyny goşalandyrdy.
Şeýle hem ýokarda agzalan mejlisiň barşynda hormatly Prezidentimiz «Türkmenistanyň Oba hojalyk ministrligini üýtgedip guramak hakynda» Permana gol çekdi. Resminama laýyklykda, Türkmenistanyň Oba hojalyk ministrliginden bölünip aýrylmagy arkaly, «Türkmengallaönümleri» döwlet birleşigi, Türkmenistanyň Azyk senagaty döwlet birleşigi, Türkmenistanyň Maldarçylyk we guşçulyk senagaty döwlet birleşigi, «Türkmenpagta» döwlet konserni hem-de «Türkmenobahyzmat» döwlet birleşigi döredildi.
Oba hojalygynda meýdan işlerini öz wagtynda agrotehniki möhletlerde geçirmek üçin, elbetde, degişli pudaklardan daýhanyň dökün, suw, tehnika bilen doly derejede, öz wagtynda üpjün edilmegi möhüm bolup durýar. Şoňa görä-de, nobatdaky resminamalaryň bu ugurdaky wezipeleriň üstünlikli amala aşyrylmagynyň oňyn ähmiýeti bar.
Ata-babalarymyzyň aýdyşy ýaly, daýhan baýasa, ýurt baýar! Arzysy bilinse, daýhan galkynar, arzysy ýetse, bereket joşar.
Batyrguly ÖWLÝAGULYÝEW,
Türkmenistanyñ Agrar partiýasynyñ Lebap welaýat Halaç etrap komitetiniñ başlygy.
