«Pähim-paýhas ummany Magtymguly Pyragy» ýylynyň öňüsyrasynda Arkadagly Gahryman Serdarymyzyň parasatly taglymatynyň ajaýyp nusgasy — «Ýaşlar — Watanyň daýanjy» atly ilkinji kitabynyň çapdan çykmagy bizi bilim-terbiýeçilik işgärleri hökmünde buýsanç duýgusyna gurşady.
Bu kitap öz bölümleri, hakydalarda orun alan pursatlardan fotosuratlary, baý maglumat gory, beýan ediliş täsirliligi, pelsepewi pikirleri we durmuşy wakalara ýüzlenmeleri taýdan ähli okyjylary özüne çekýär. Söze sarpa goýýan, döredijilige uly ähmiýet berýän Arkadagly Gahryman Serdarymyzyň döredijilik sungatynyň, döwleti dolandyrmakdaky we gazanylan üstünlikleri beýan etmekdäki taglymatynyň nusgalykdygyny alamatlandyrýan bu eser ýaş nesle bildirilýän belent ynamy, türkmeniň terbiýe mekdebine goýulýan hormat-sarpany nobatdaky gezek belende göterdi. Hormatly Prezidentimiz bu kitabynda peder ýolunyň mukaddesligine, ata-babalarymyzyň ýoly bilen öňe gitmegiň kämil ýoluna, ýaşlaryň jemgyýetdäki ornunyň pugtalandyrylmagyna, gazanylan üstünliklerde we öňde goýulan belent maksatlara ýetmekde nesilleriň arabaglanyşygyna, umuman, ähli babatdaky möhüm ýörelgelere ussatlyk bilen ünsi çekýär. Bu kitabyň sahypalaryna çuňňur aralaşdygyňça, duýgy-düşünjeleriň durlanyp, tereň täsirler seriňi gurşaýar.
Ýeri gelende bellesek, kitapda şeýle setirler bar: «Watanyň beýikligi, mukaddesligi hakyky mazmunynda açylanda, öňde goýlan maksat durmuşa geçýär. Häzirki döwürde dünýäde durmuşa höwesliligi, hyjuwlylygy artdyrmaga kömek edýän kitaplar köp okalýar. Şeýle kitaplaryň ýaşlara öz ukyplaryny açmaga ýardam edýän halatlary hem köp bolýar. Şol bilimleri hem watançylykdan aýratynlykda göz öňüne getirmek kyndyr. Esasy bilim, iň wajyp terbiýe watançylykdadyr. Beýik ösüşlere ýetmek üçin ilki Watany söýmegi öwrenmeli».
Bu sözler «Ýaşlar — Watanyň daýanjy» atly kitabyň hut özi babatda aýdylanda hem şeýledir. Çünki bu kitabyň ähli sahypalary, zerden zyýada sözleri biziň her birimizi watansöýüjiligiň täze belentliklerine göterýär. Watana berilmegiň, ony söýmegiň, goýnunda zähmet çekmegiň, ömrüň manysydygyny tekrarlaýar. Şeýle-de şahsyýet hökmünde kemala gelmekde Watanyň ornunyň juda ýokarydygyna düşünmäge pursat berýär, diňe Watany söýüp, gorap beýgelip bolýandygyna göz ýetirmäge mümkinçilik açýar. Şonuň üçin hem Gahryman Arkadagymyzyň eserleri ýaly, bu kitabyň gadyr-gymmaty hem ähli döwrüň nesilleri üçin hem görelde mekdebi bolar. Çünki ýyllardan-ýyllara, illerden-illere ýaýrajak şeýle eserlere ýaş nesilleri terbiýelemek işlerinde baý gory bolan gollanma hökmünde garalýar.
Berkarar döwletiň täze eýýamynyň Galkynyşy döwründe ähli raýatlaryň milli watançylyk ruhuny belende göterýän, paýhas akabasynyň joşgunly tolkunlary bilen ykballary bagtyň kenaryna iterýän, döwletli taglymatlary bilen döwletimiziň kuwwatyny asyrlara hem alyslara ýetirýän Arkadagly Gahryman Serdarymyza hem-de halypalyk mekdebi bilen nesilleri ak daňlara atarýan Gahryman Arkadagymyza köňülleriň alkyşlary egsilmezdir.
Maýsa ÝUSUPOWA,
Baýramaly şäherindäki 1-nji çagalar bagynyň müdiri, KA-nyň işjeň agzasy.
