Ýaponiýa — dünýäde bilimi baýdak edinip ösüş gazanmagyň, döwrebap tehnologiýanyň, oýlap tapyşlaryň gözümiziň öňündäki mysaly. Dünýä döwletlerini tanap-bilip başlan her kimiň aňynda Ýaponiýa bilimiň ýurdy hökmünde janlanýar.
2009-njy ýylyň noýabr aýynda Aşgabatda ýapon sazynyň festiwaly geçirildi. 2011-nji ýylyň 2-nji sentýabrynda Aşgabatda häzirkizaman ýapon aýdym-sazynyň agşamy guraldy. 2007-nji ýylyň aprelinde, 2012-nji ýylyň iýun aýynda Aşgabatda ýapon filmleriniň görkezilişi boldy.
2016-2017-nji okuw ýylyndan başlap, ýurdumyzyň mekdeplerinde ikinji daşary ýurt dili hökmünde ýapon dilini öwrenmek boýunça maksatnama hereket edýär. 2016-njy ýylda bolsa Aşgabatda Oguz han adyndaky Inžener-tehnologiýalar uniwersiteti we ýöriteleşdirilen orta mekdep açylyp, olaryň maksatnamasyna ýapon dili girizildi.
2022-nji ýylyň fewral aýynda ýapon dilini öwrenmek üçin enjamlary gowşurmak boýunça şertnama gol çekmeklik dabarasy boldy. Ýaponiýanyň türkmen talyplary bilen dostlukly gatnaşyklary berkitmek boýunça «MIRAI» maksatnamasynyň çäklerinde türkmen ýaşlary eýýäm birnäçe gezek Ýaponiýada okuw saparlarynda boldular.
Türkmenistanyň orta we ýokary okuw mekdepleriniň ençemesine ýapon dili dersi girizildi. Ýokary okuw mekdepleriniň 6-synda ýapon dili kafedralarynyň hereket etmegi, paýtagtymyzyň özünde 12 sany mekdepde ýapon diliniň öwredilmegi iki ýurduň arasyndaky bilim-ylym ulgamyndaky hyzmatdaşlygyň barha pajarlaýandygynyň aýdyň subutnamasydyr. Ýaponiýanyň Okaýama uniwersitetinde «Türkmen diline giriş» atly uly göwrümli kitabyň neşir edilendigini hem nygtap geçmek gerek.
Türkmen-ýapon hyzmatdaşlygynyň medeni ugurlarynda geçilen menzillerden görnüşi ýaly, halklaryň arasyndaky dost-doganlygy berkitmekde iň ygtybarly ýollaryň biri-de medeni gatnaşyklary ösdürmekdir. Medeni hyzmatdaşlyk iki doganlyk halkyň arasyndaky gatnaşyklaryň hemişe joşgunly, ynamly, ruhubelent we netijeli ýagdaýa eýe bolýandygyny alamatlandyrýar. Bir söz bilen jemläniňde, medeniýet halklary dostlaşdyrýar, kalplary ýakynlaşdyrýar.
Gülruh MEREDOWA,
Türkmenistanyň Oguz han adyndaky Inžener-tehnologiýalar uniwersitetiniň talyby.
