Berkarar döwletiň täze eýýamynyň Galkynyşy döwründe ýurdumyzda alnyp barylýan saglyk syýasaty bütin dünýäde uly goldawa eýe boldy. Adamyň saglygy, beden we ruhy taýdan sazlaşykly ösmegi häzirki döwürde ýurdumyzda alnyp barylýan syýasatyň ileri tutulýan esasy ugurlarynyň biridir.
Gahryman Arkadagymyzyň baştutanlygynda işlenip taýýarlanylan ,,Saglyk’’ Döwlet maksatnamasyna laýyklykda, saglyk ulgamyny mundan beýläk-de ösdürmek üçin köpugurly çäreler durmuşa geçirilýär. Şol çärelerde adam saglygy üçin zyýanly endiklere, hususan-da, çilimkeşlige garşy göreşi güýçlendirmäge aýratyn ähmiýet berilýär. Ilatyň arasynda işjeň geçirilýän düşündiriş işleri, ýurdumyzda satylýan temmäki önümleriniň bahalarynyň artdyrylmagy, çilimkeşlige gözegçilik etmek boýunça berk çäreleriň amala aşyrylmagy ýürek-damar we respirator keselleri bilen keselleýän adamlaryň sanynyň ep-esli azalmagyny üpjün etdi.
,,Saglyk’’ Döwlet maksatnamaasynyň esasy maksady ilatyň saglygyny goramakdan, adamlaryň ömrüniň dowamlylygyny uzaltmakdan we jemgyýetiň hemmetaraplaýyn ösmegini üpjün etmekden, sagdyn durmuş kadalaryny ornaşdyrmakdan ybaratdyr. Türkmenistan lukmançylyk işgärlerini we ylmy işgärleri taýýarlaýyş ulgamyny yzygiderli ýagdaýda kämilleşdirmek bilen, saglygy goraýyş ulgamynda tejribe alyşmagyna ýardam berýän halkara hyzmatdaşlygynyň ösdürilmegine uly üns berilýär.
Hormatly Prezidentimiz Serdar Berdimuhamedowyň başlangyçlary bilen görülýän anyk çäreleriň hatarynda öňüni alyş işleriniň güýçlendirilmegi, döwrebap lukmançylyk tehnologiýalarynyň we enjamlaryň, jemgyýetimize sagdyn durmuş ýörelgeleriniň işjeň ornaşdyrylmagy, aýratyn hem ýaşlaryň arasynda köpçülikleýin bedenterbiýe-sagaldyş hereketleriniň wagyz edilmegi ýaly çäreler bar.
Annamyrat ANNADOW,
Myrat Garryýew adyndaky Türkmenistanyň
Döwlet lukmançylyk uniwersitetiniň Lukmançylyk gullugynyň guralyşy we usulyýeti kafedrasynyň müdiri, lukmançylyk gullugynyň podpolkownigi.
