Paýtagtymyzda Kuraş boýunça dünýä çempionaty başlandy. Janköýerlere erkekleriň arasynda ýedi, zenanlaryň arasynda hem sekiz agram derejesinde gyzykly tutluşyklara tomaşa etmek garaşýar.
Kuraş boýunça dünýä çempionatynda Türkmenistana 15 türgen wekilçilik eder. Türkmenistanyň at gazanan tälimçisi Dörtguly Tejenowyň şägirtlerinden 60 kilograma çenli agram derejesindäki ýaryşlarda ýurdumyza Türkmenistanyň birnäçe gezek çempiony Wepa Awlýakulyýew wekilçilik eder. Edil Wepa ýaly, milli ýaryşlarda ençeme ýola hormat münberiniň iň ýokarky basgançagyna çykan we halkara ýaryşlarda tejribe toplan Döwlet Hemrakulyýewe 66 kilograma çenli agram derejesinde ýurdumyzyň sport abraýyny goramak ynanyldy. Şu ýyl Hytaý Halk Respublikasynda geçirilen Aziýa çempionatynda bürünç medalyň eýesi bolan Şatlyk Jumanyýazow indi paýtagtymyzda dünýä çempionlygy ugrunda göreşer. Kuraşdan başga-da, sportuň kikboks görnüşi boýunça hem ýaryşlara gatnaşyp, halkara tejribäni baýlaşdyran Daýan Omirow 81 kilograma çenli agram derejesinde ýurdumyzyň sport abraýyny gorar. 90 kilograma çenli agram derejesinde bolsa halkara ýaryşlaryň birnäçesinde medallara mynasyp bolan Sanjar Abdyrahmanow düşekçä çykar. Erkekleriň arasynda 100 kilograma çenli we 100 kilogramdan ýokary agram derejelerinde Ruslan Esgerow bilen Sapa Sapaýew çykyş eder.
Edil ýigitlerimiz ýaly, Türkmenistanyň zenanlar ýygyndysynyň hem halkara derejede baý tejribesi bar. Heniz orta mekdebiň 10-njy synpynda okaýarka, dünýä çempionatynyň bürünç medalyna mynasyp bolan baýry tälimçi Şirin Kubaýewa 48 kilograma çenli agram derejesinde Aýşirin Haýdarowa ynam bildirdi. Çärjew etrabyndaky 2-nji sport mekdebinde tälimçi bolup işleýän Aýşirin kuraş bilen orta mekdebiň 9-njy synpynda okaýarka tanşan hem bolsa, eýýäm halkara ýaryşlaryň ençemesinde medal gazanmagy başardy. 52 kilograma çenli agram derejesinde düşekçä çykjak türkmenabatly türgen Aýnur Amanowanyň 2019-njy ýylda Koreýa Respublikasynda dünýä çempiony bolandygy mälimdir. Soňky iki ýylda halkara derejeli medallaryň birnäçesine mynasyp bolan türgen gyzyň umydy ýene-de altyn medal. 57 kilograma çenli agram derejesinde ýurdumyzyň sport abraýyny goramak ynanylan Gülşat Joraýewa şu ýyl Hytaý Halk Respublikasynda geçirilen Aziýa çempionatyna hem gatnaşdy. Häzirki wagtda Türkmenabat şäherindäki 10-njy sport mekdebinde tälimçi bolup işleýän Dinara Rozykulyýewa nobatdaky çempionatda 63 kilograma çenli agram derejesinde ýaryşa goşular. 70 kilograma çenli agram derejesinde ýurdumyzyň sport abraýyny gorajak Mariýa Lohowa Aşgabatda geçirilen Ýapyk binalarda we söweş sungaty boýunça V Aziýa oýunlarynda hem kuraş boýunça kümüş medala mynasyp bolupdy. Şondan bir ýyl soňra Aziýanyň çempiony bolan Mariýa 2019-njy ýylda Koreýa Respublikasynda geçirilen dünýä çempionatyndan Watanymyza bürünç medal bilen dolanyp gelipdi.
78 kilograma çenli agram derejesinde ýaryşa çykjak Sabina Kadyrowa — zenanlar ýygyndymyzyň iň ýaş agzasy. 16 ýaşly Sabina Türkmenabat şäherindäki 29-njy orta mekdebiň 11-nji synpynda okaýar. Ýaşdygyna garamazdan, öz agram derejesinde birnäçe gezek Türkmenistanyň çempiony bolan türgen Aşgabatda geçiriljek dünýä çempionatynda ilkinji gezek halkara synaga çykar. 87 kilograma çenli agram derejesinde ýaryşa goşuljak saýatly tälimçi gyz Jahan Muhammedowa soňky ýyllarda gatnaşan halkara ýaryşlarynyň hiç birinden hem boş gaýdyp gelmedi. Onuň dünýä çempionatlarynda-da baý tejribesi bar. Jahan şu gezekki çempionatda-da medala garaşylýan esasy türgenlerimiziň biri. Zenanlaryň arasyndaky ýaryşyň iň ýokary agram derejesinde — 87 kilogramdan ýokary agramda jiu-jitsu we sambo boýunça dünýä we Aziýa çempionatlarynyň ençemesinde medallara mynasyp bolan dänewli türgen Sabina Agajanowa ýurdumyza wekilçilik eder.
Ýurdumyzyň türgenleri iri halkara ýaryşlara yzygiderli gatnaşyp, baýrakly orunlara, medallara eýe bolýarlar. Şu ýylyň başyndan bäri türkmen türgenleri halkara ýaryşlaryň 243-sine gatnaşyp, 190 altyn, 194 kümüş we 290 bürünç, umumylykda 674 medala mynasyp boldular. Bularyň ählisi sport ýurdy hökmünde Watanymyzyň abraý-mertebesiniň artýandygyna aýdyň şaýatlyk edýär.
Maral HOJAGULYÝEWA,
Lebap welaýatynyň Taryhy we ülkäni öwreniş muzeýiniň uly ylmy işgäri.
