Ýokary tizlikli enjam
«Tap Systems» kompaniýasy dürli barmak hereketleri bilen sanly signallary kodlamaga ukyply «TapXR» atly enjamyň täze görnüşini hödürledi. «TapXR-iň» täze görnüşi öňküsinden tapawutlylykda bilezik görnüşinde ýasaldy we ony ähli barmaklaryňa geýmek mejburlygy aradan aýryldy. Onuň bilen minutda 70 sözden hem köp ýazuw tizligini gazanyp bolýar. Enjam häzirki wagtda haýsy barmagyň haýsy ýere degýändigini kesgitlemek üçin hereket we optiki datçikleri ulanýar we görkezmeleri 99 göterim takyklyk bilen iberýär. Mundan başga-da, enjam 100-den gowrak görkezmeleri kesgitlemek we geçirmek üçin ulanyjy tarapyndan programmalaşdyrylyp bilinýär. Şeýle hem, dürli diller we amaly programmalar üçin jemgyýet tarapyndan döredilen müňlerçe giriş profiliniň islendik birini göçürip almak mümkinçiligi bar. Onuň batareýasy enjamyň 10 sagat üznüksiz işlemegi üçin ýeterlikdir. «TapXR» başga enjamlar bilen bilelikde ulanmak üçin hem amatlydyr.
Täsin ulag
«Hyundai» kompaniýasy ýangyç, elektrik hereketlendirijisini ýa-da wodorod ýangyç öýjüginiň ulanyşyny kämilleşdirmek bilen, has öňe seredýär. Kompaniýa syýahatçylygy gowulandyrmak üçin eýýäm has düýpli ykjam hereketlendirijileri göz öňünde tutýar. Şeýlelikde, «Hyundai» kompaniýasy ygtybarly senagat dizaýn firmasy «Sundberg-Ferar» bilen bilelikde täze bir taslama döretdi. Ol robot aýagy bilen enjamlaşdyrylan elektrik ulagydyr. Täze üýtgeşik taslama «Elevate», ýagny «Ýöriş ulagy» diýlip atlandyrylýar. Çylşyrymly, köp bogunly aýaklar bu «ýöriş ulagyna» basgançaklara çykmak, akýan suwdan ýokary galmak, hatda boşluklardan böküp geçmek mümkinçiligini döredýär. «Elevate» halas ediş toparlaryna adaty ýollaryň bozulan ýerlerine baryp ýetmäge mümkinçilik döredip, gurluşykda ýa-da betbagtçylyklarda kömek bermekde uly ýardam berip biler. Şeýle hem, maýyplar üçin oturgyçlara ýa-da binanyň basgançaklaryna dyrmaşmaga oňaýly şertleri hödürläp biler.
Taýýarlan: Eziz EMINOW,
TDIM-niň Halkara gatnaşyklary institutynyň Halkara žurnalistikasy fakultetiniň 2-nji ýyl talyby.
