Ýakynda, Türkmengala etrabyndaky iňlis dilini çuňlaşdyryp öwredýän ýöriteleşdirilen 8-nji çagalar bakja-bagynda «Mekdebe çenli çagalar edaralarynda daşary ýurt dillerini öwretmegiň öňdebaryjy iş usullary» diýen tema boýunça usuly-amaly maslahat geçirildi.
Welaýat derejesinde guralan bu usuly-amaly maslahata degişli düzümleriň öňdebaryjy bilim-terbiýeçilik işgärleri, daşary ýurt dili mugallymlary işjeň gatnaşdylar. Çäräniň barşynda myhmanlar degişli ugur boýunça okuw-görkezme esbaplarynyň, elde taýýarlanylan görkezme serişdeleriniň we häzirkizaman okuw işinde peýdalanylýan enjamlaryň görnüşleri jemlenen sergi bilen tanyşdylar. Bu ýerde daşary ýurt dilleri, şol sanda iňlis, rus dilleri boýunça sapak pursatlarynyň, gyzyklanma we göwnaçma çäreleriniň guralyş aýratynlyklarynyň görkezilişi boldy. Okuw-terbiýeçilik mazmunly bu pursatlar çagalaryň ýaş aýratynlyklaryna görä, okuw maksatnamasyndan ugur alnyp geçirildi. Daşary ýurt dillerini okatmagyň häzirkizaman usulyýetine laýyklykda guralan sapaklar, göwnaçma çärelerinden pursatlar çärä gatnaşanlarda uly täsirleri galdyrdy.
Belläp geçsek, sapaklarda sanlylaşdyrylan tehnologiýalardan peýdalanmaga, elektron görkezme serişdelerini ulanmaga, şeýle-de öwrediji oýunlardan hem peýdalanmaga uly orun berildi. Şunda rus dili we iňlis dili boýunça geçirilen okuw-terbiýeçilik işleri çagalaryň bilimleri özleşdirmeklerindäki, dil sowatlylygy boýunça taýýarlygyny ýokarlandyrmagyň aýratynlyklary ýüze çykýar. Çagalaryň sapaklara işjeň gatnaşmaklary, daşary ýurt dillerinde sözleri we söz düzümlerini, şahyrana bentleri we aýdymlary ýerine ýetirmek başarnyklary bolsa daşary ýurt dillerini okatmakda gazanylýan we yzygiderli ösdürilýän tejribäniň kämilleşdirilýändigini görkezýär.
Usuly-amaly maslahatyň esasy bölüminde bolsa tejribeli pedagoglaryň, ussat hünärmenleriň çykyşlary, usuly maslahatlary diňlenildi. Şeýle-de öňdebaryjy iş tejribeden görkezme serişdelerine, prezentasiýalara üns çekildi. Çykyş edenler ýurdumyzda durmuşa geçirilýän bilim özgertmeleri, «Türkmenistanda daşary ýurt dillerini okatmagy kämilleşdirmegiň Konsepsiýasynyň» ähmiýeti, öňdebaryjy iş tejribesiniň öwrenilişi, mugallymlaryň hünär taýýarlygynyň ýokarlandyrylyşy, usuly serişdeleriň we sanly maglumat gorunyň peýdalanylyşy hem baýlaşdyrylyşy barada giňişleýin belläp geçdiler.
Welaýatymyzyň mekdebe çenli çagalar edaralarynyň düzümlerinde daşary ýurt dilleriniň okadylyşynda öňdebaryjy iş usullarynyň öwrenilmeginde, üstüniň ýetirilmeginde we kämilleşdirilmeginde pedagogik taýdan ýokary ähmiýetli bolan bu çäre netijeli we täsirli boldy.
Berkarar döwletiň täze eýýamynyň Galkynyşy döwründe ýaş nesliň milli terbiýeli, döwrebap bilimli şahsyýetler hökmünde kemala gelmekleri üçin ähli mümkinçilikleri we şertleri döredip berýän Türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza alkyşlarymyz egsilmezdir.
Haliça BARATOWA,
Türkmengala etrabyndaky iňlis dilini çuňlaşdyryp öwredýän
ýöriteleşdirilen 8-nji çagalar bakja-bagynyň rus dili mugallymy.
