Semizlik – bu bedende ýagyň artykmaç toplanmagy diýmekdir. Kadaly bedende ýag 10 göterim bolmalydyr. Eger-de, bu göterim 15-29 derejä ýetse, onda bu semizligiň 1-nji derejesi diýlip hasaplanylýar. Göterim 30-49-dan artsa, 2-nji derejeli, göterim 50-100 derejä barsa, onda ol bejerip bolmasy kyn bolan 3-nji derejeli semizlikdir. Eger-de, göterim 100-den ýokary bolsa, 4-nji derejä degişli semizlikdir, bu derejedäki semizligi bejermek mümkinçiligi örän azdyr.
Semizlik ýaşa bagly zat däldir. Semizlik ýagdaýy kiçi çagalarda-da, ýaşlarda-da duş gelýän ýagdaýlaryň biridir. Artykmaç iýmit, az hereketlilik, agşamlaryna köp iýmek, aýratynam, konditer önümlerini köp iýmek semizlige getirýän ýagdaýlar hasaplanýar.
Erkeklerde semizlik garnyň ölçegi 94 santimetrden köp bolsa, gormon testosteronyň döremegi azalýar. Semizlikden goranmak üçin artykmaç agram bilen göreşmeli.
Bilermenler horlanmak isleýänlere aşakdaky 5 sany düzgüni maslahat berýärler:
– ýatar garna iýip-içmezlik;
– gereginden artykmaç iýmezlik;
– howlukman iýmek, çünki çalt iýseň, doýanyňy bilmeýärsiň;
– gök önümleri köpräk iýmek;
– gündelik hereketi köpeltmek.
Boş wagtyňyzy telewizora ýa-da öýjükli telefonlara sarp etmäň! Hereket – ýaşaýyş, şonuň üçin arassa howada köpräk pyýada geziň! Hatda mümkinçilik bolan halatynda suwda ýüzüň!
Saglygyňyzy gowulandyrmak öz eliňizde!
Güljemal ARTYKOWA,
TOHI-niň Gidromeliorasiýa we oba hojalygyny mehanizmleşdirmek fakultetiniň Gidromelioratiw ulgamlaryny ulanmak hünäriniň 4-nji ýyl talyby.
