Täze ýyl mynasybetli her birimiz öýümizde dürli lezzetli tagamlary taýýarlap, baýramçylyk saçagyna äbermek bilen ýakyn adamlarymyza, myhmanlara özümiziň hoşniýetli garaýşymyzy bildirýäris. Öý bikesi tagam taýýarlamak üçin, ilkinji nobatda, şahsy gigiýenanyň düzgünlerini berk berjaý etmeli. Nahar taýýarlamazdan öň, her gezek gök we beýleki önümleri, gap-gaçlary akar suwda ýuwmaly. Iýmit önümleriniň howpsuzlygynyň düzgünlerini berjaý etmeli.
Tagamlary aşa köp we garym-gatym edip iýmekden saklanmaly, sebäbi adamyň bedeni belli bir iýmite öwrenip, onuň birdenkä üýtgedilmegi onuň saglyk ýagdaýyna zeper ýetirmegi ýa-da aşgazan-içege ýollarynyň, ýürek-damar ulgamynyň näsazlyklaryna, gan basyşynyň ýokarlanmagyna getirip biler. Meselem, çişligiň gapdalyndan, adatça, äberilýän buglanan, gowrulan ýer almasy bu tagamyň siňmegini kynlaşdyrýar, eger-de ter gök otlar we çig gök önümler bilen iýilende tagamyň gowy özleşmegine getirýär. Saçagyň üstüne ter gök otlary, limon şiresi garylan gök önümleri we miwe işdäaçarlary, balyk, guş etini äberiň!
Täze — 2024-nji ýyl Gahryman Arkadagymyzyň we Arkadagly Gahryman Serdarymyzyň parasatly baştutanlygynda şanly wakalara, uly ýeňişlere we täze üstünliklere beslensin! Goý, täze ýyl agzybirligiň, asudalygyň, abadançylygyň hem-de rysgal-döwletiň ýylyna öwrülsin!
Atajan KOÇKAROW,
Lebap welaýat onkologiýa hassahanasynyň ultrases lukmany.
