Düşünip bilemok ähli zatlara,
Ähli zatlar düşünjämde düşleýär.
Teblesinden boşap bilmän duran deý,
Sarç duýgular tozan turzup kişňeýär.
Bimahal işigi kakan myhmanyň,
Ahwaly aňymda.
Müýnli bakýaryn.
Soragly nazaryn dikýär imanym.
Erk bersem eline hatda üstümden
Arza ýazjak
Menden närza ykbalam.
Ruhum mumýalanan
Ten – piramida.
Gatbar-gatbar daşyň astyndan çykyp
Başarsaň çalajan arzuwyň ide,
Direl ýaňadan.
Duýgulam delminip isleýär haraý,
Düşegim – haraba,
Düýşüm – al sähra.
Dagyň çür başynda hellewläp saraý,
Güjeňläp özüni
Öwürjek sähnä.
Kelebiň ujuny ýitiren telbe
Ýekirler
Ýetim deý boýny burular.
Ýardamyň ýetermi?! Barlap gör gel-de!
Ataşly gözümi tutdy gurumam.
Ýitip gidýän piramidaň içinde.
Yşyksyz şöhle parran geçýär inimden.
Ideýän tümlükden birilerini,
Hem tümlükde gaçyp barýan birinden.
Halas bolmak üçin
Halas etmeli.
Eýesiz selpäp ýör han-ha ykbalym.
Soragly nazaryň dikme-de indi,
Oýan ahyr,
Oýar ahyr
Imanym!
Maksatmyrat ÇARYÝEW.
