Gel, bu hyýallamdan ogurla meni,
Gel, didäm, halas et meni özümden.
Ýogsam günäkäri özüň bolarsyň
Bu gubardan bölek-bölek bölünsem.
Peýläp ýörme tüm gijeden amaty,
Gel-de, süýr günortan ogurla meni.
Bu ogurlyk bilen amal edersiň
Dünýäniň iň uly dogrulygyny.
Hiç kim günälemez ogurlygyňy,
Men bolsa ömürlik alkyş okaryn.
Çünki şeýdip halas edersiň, dünýäm,
Bu kalby – gümürtik oýlaň mekanyn.
Gyr kökün bigerek ýaýdanjaňlygmyň,
Howsalamyň ýatan ýerin oýup git.
Al, baryny, ýöne ýekeje zady –
Enem üçin yhlasymy goýup git.
Agageldi ITALMAZOW.
