Bütin dünýäde howanyň gyzmagy gyşky Olimpiýa oýunlarynyň geljegini howp astyna salýar, emeli gar bolsa ýagdaýy ýene-de ýaramazlaşdyrýar. Beýle netijä Britaniýanyň «Lofboro» uniwersitetiniň alymlary geldiler. Olar öz tejribelerine daýanyp, emeli gara ölüm howply diýip baha berdiler.
Yklymlaryň özgermegi sebäpli 2050-nji ýyla baryp, oýunlaryň geçirilýän käbir şäherlerinde gyşky sport ýaryşlary üçin hakyky gar ýeterlik bolmaz. 2022-nji ýylda Hytaý Olimpiýa oýunlarynyň guramaçylary hem emeli gary ulanmaga mejbur boldular. Ýöne türgenler we alymlar beýle garyň oýna gatnaşyjylaryň ykbalyny howply ýagdaýa salmagynyň mümkindiginden howatyrlanýarlar.
Britaniýaly hünärmenleriň hasabatlaryna görä, emeli gar 30 göterim buzdan we 70 göterim howadan ybarat. Şonuň bilen birlikde, hakyky garda 10 göterim buz we 90 göterim howa bar.
— Buz ýollary emeli gardan ýasalsa, olar örän gaty bolar. Bu sportsmen üçin howply. Öň şeýle ýagdaýda ölüm halatlary hem hasaba alnypdy — diýip, şotlandiýaly lyžaçy Laura Donaldson belleýär.
«TürkmenGazet».
