2022-nji ýylda Aziýa sebitlerinde dürli derejeli saýlawlaryň geçirilmegine garaşylýar. Has takygy, şu ýyl günorta Koreýada prezident saýlawynyň, Filippinlerde prezidentlik, parlament we ýerli saýlawlaryň, Liwanda parlament saýlawynyň, Hindistanda bolsa prezident we parlament saýlawlaryň geçirilmegine garaşylýar.
9-njy mart güni günorta Koreýada prezident saýlawlary geçiriler. Ýurduň Konstitusiýasyna görä, prezident umumy, deň, gönüden-göni we gizlin ses bermek arkaly saýlanylýar. Prezidentlik wezipesi 5 ýyl. Saýlawlarda 19 ýaşy dolan ýurduň raýatlarynyň ses bermäge hukugy bar. Saýlawlarda 40 we ondan uly ýaşly, ýurtda azyndan 5 ýyl ýaşan günorta Koreýanyň raýaty prezidentlige dalaşgär bolup biler.
9-njy maýda Filippinlerde prezidentlik, parlament we ýerli saýlawlar geçiriler. Bu saýlawlarda ýurduň raýatlary prezidenti we wise prezidentini, şeýle hem kanun çykaryjylary we müňläp ýerli hökümet işgärlerini saýlarlar. Ýurduň Konstitusiýasyna görä, prezident Filippinleriň 18 ýaşy dolan raýatlary tarapyndan umumy ses bermek arkaly, 6 ýyllyk möhlet bilen saýlanýar. Wise prezident hem ýurduň prezidenti bilen bir wagtyň özünde saýlanýar. Filippin Kongresi (parlamenti) iki palatadan — Senatlar we wekiller palatasyndan ybaratdyr. Senatorlar 6 ýyl möhlet bilen, deputatlar bolsa 3 ýyllyk möhlet bilen saýlanýarlar.
15-nji maýda Liwanda parlament saýlawlary geçiriler. Liwanyň saýlaw kanunçylygyna laýyklykda, parlament saýlawlary proporsional düzgün esasynda geçiriler.
25-nji iýul gününde Hindistanda prezident we parlament saýlawlarynyň geçirilmegine garaşylýar. Ýurduň prezidenti 5 ýyl möhlet bilen saýlanylýar. Ses beriş gizlin ses bermek arkaly geçiriler. Ýurduň 35 ýaşdan uly raýatlary prezidentlige dalaşgär bolup bilerler.
Hemragül ASTANOWA,
Lebap welaýatynyň Çärjew etrabyndaky 33-nji orta mekdebiň taryh mugallymy.
