9-njy dekabrda paýtagtymyzda Türkmenistanyň Prezidentiniň tabşyrygy boýunça «Baky Bitarap Türkmenistan» atly halkara wirtual sergi açyldy we maslahat geçirildi.
Sergini görmek isleýänler virtualexpo.gov.tm saýty arkaly goşmaça hasaba alyş işlerini geçmezden, tomaşa edip bilerler. Wirtual serginiň degişli bölümlerinde berilýän maglumatlar, wideogörnüşler internet ulanyjylary üçin elýeterlidir. Sergide görkezilýän gymmatlyklar baradaky maglumatlaryň hem-de öndürilýän önümleriň, ýerine ýetirilýän hyzmatlaryň görnüşleriniň türkmen, rus we iňlis dillerinde berilmegi wirtual serginiň halkara derejesindäki ähmiýetiniň belende galmagyny şertlendirýär.
Serginiň açylmagy mynasybetli geçirilen maslahat hem işjeň ýagdaýda geçdi. Oňa Dubaýyň ykdysady departamentiniň agzasy, «Alamaip» kompaniýasyny esaslandyryjy Fahad Abdulla Saleh «EKSPO-2020» Bütindünýä sergisiniň Türkmenistan bölüminden maslahata sanly ulgam arkaly gatnaşdy.
TürkmenGazet.
