Isamal, Meksika
Isamal, Meksikanyň Ýukatan ştatynda, paýtagt Meridanyň 72 km (takmynan 40 mil) gündogarynda ýerleşýär. Häzirki wagtda şäheriň takmynan 30 müň adamdygy çak edilýär. Bu şäherçe Ýukatanda “Sary şäher” diýlip atlandyrylýar.
Şäheriň merkeziniň ýalpyldawuk altyn sary reňk bilen çekilmeginiň sebäbi barada birnäçe çaklamalar bar. Olaryň birinde Rim papasy Jon Pol II-iň 1993-nji ýyldaky saparynyň hormatyna Isamalyň sary reňkine örtülendigi aýdylýar. Şäheriň özi bal reňkdäki gadymy Maýa Gün hudaýynyň piramidalarynyň mekanydyr.
Isamal Rim Katolik mukaddeslerine hormat goýmak üçin Ýukatan ştatynyň zyýarat mekany bolup galýar. Bu ýeriň esasy dilleri ispan we maýa dilleridir. Ýöne halkyň aglaba bölegi maýa dilinde gürleýärler.
Isamal 2002-nji ýylda ,,Jadyly şäher” (ispan dilinde “Pueblo Mágico”) adyny aldy.
Huskar, Ispaniýa
Huskar Ispaniýanyň günortasyndaky Andalusiýa awtonom jemgyýetiniň bir bölegi bolan Malaga welaýatynda bir şäher. Häzirki wagtda şäheriň ilaty ortaça 225 adam.
2011-nji ýylyň ýazynda “Sony Pictures” kompaniýasynyň teklip etmeginde şäherdäki binalar (ybadathana we mazar daşlaryny goşmak bilen) Smurfs filminiň ilkinji görkeziliş dabarasyny bellemek maksady bilen gök reňke boýaldy. Bu binalar üçin 4000 litr boýag ulanyldy. Şondan soň alty aýda takmynan 80 müň syýahatçy geldi. Bu şähere adatça ýylda 300 syýahatçy gelýär.
Şefşauen (Şawen), Marokko
1471-nji ýylda Mulaý Ali bin Musa bin Raşid el-Alami tarapyndan esaslandyrylan Şefşauen (Marokkalylar bu ýere Şawen diýýärler) Ispaniýadan gelen bosgunlar üçin Maori galasy bolup hyzmat etdi. Asyrlaryň dowamynda şäher ösüp, ýewreýleri we hristianlary kabul etdi.
Şefşauen dünýäniň täsin ýerleriniň biridir. Bu şäher gök reňke boýalmagy bilen syýahatçylaryň köp gelýän ýerleriniň birine öwrüldi.
Şefşaueniň gök diwarlary meşhur gyzyklanma döredýär. Diwarlaryň näme üçin gök reňk bilen boýalandygy barada birnäçe teoriýa bar. Ol teoriýalaryň birinde gök reňk çybynlary uzaklaşdyrýar diýilýär. Emma käbir teoriýalara görä, gök reňk asmany alamatlandyrýar we ruhy durmuşda ýaşamagy ýatladýar diýlip, bellenilip geçilýär.
Weher de la Frontera, Ispaniýa
Weher de la Frontera Barbate derýasynyň sag kenaryndaky Andalusiýanyň Kadiz welaýatynda Ispaniýanyň daglyk şäheri. Bu şäher Gibraltar bogazyna seredýän baglar we mämişi agaçlary bilen gurşalan pes depäni eýeleýär. Onda birnäçe gadymy buthanalar bolup, köp öýleriniň binagärçiligi Maori döwrüni ýada salýar. Şäheriň ilaty esasan oba hojalyk, miweli ekerançylyk, şeýle-de söweş öküzlerini ösdürip ýetişdirmek ýaly işler bilen meşgullanýar.
Ispaniýanyň syýahatçylyk taýdan özüne çekiji bu şäheri 1978-nji ýylda ,,Şäheri bezemek we abadanlaşdyrmak boýunça” I milli baýragy bilen sylaglandy. Şonuň bilen birlikde, ,,Uly syýahatçylyk akymynyň zolagy” diýen adyna hem laýyk görüldi.
Jaýpur, Hindistan
Hindistanyň Rajasthan şäheriniň paýtagty bolan Jaýpuryň binalary özbaşdak görnüşe eýedir. Bu şäher başgaça, Gülgüne şäher” ady bilen bellidir. Hindilerde gülgüne reňk myhmansöýerligiň we hoşniýetliligiň reňki hasaplanýar. Şäherde beýik desgalardan başlap kiçijik bazarlara çenli gurlan zatlaryň arhitekturasy hem gülgüne daşlardan ybaratdyr. Jaýpur Hindistanda Holy baýramyny bellemek üçin hem iň oňat ýerleriň biri hökmünde görülýär.
Jaýpur 1727-nji ýylda Sawaý Jaý Sinh II tarapyndan esaslandyryldy. Şol sebäpli şähere onuň ady goýuldy. 1863-nji ýylda Uelsiň şasy Alberti garşylamak üçin Jaýpur özüne “gülgüne” reňkli eşik geýdi. Şondan soň gülgüne reňk şäheriň aýrylmaz bölegine öwrüldi we “Gülgüne şäher” ady bilen tanaldy.
Aşgabat, Türkmenistan
Ak mermerli binalary bilen dünýä tanalan ak şäherimiz Aşgabat özüniň ajaýyp keşbi bilen görenleri haýrana goýýar. Paýtagtymyz ak mermere beslenen binalaryň köplügi bilen dünýäde deňi-taýy bolmadyk şäherdir. Bu babatda, ol 2013-nji ýylyň 25-nji maýynda Ginnesiň Bütindünýä rekordlar kitabyna girizildi. Şeýlelikde, ýurdumyzyň ähli künjeginde şol güni ,,Aşgabat şäheriniň güni” diýlip uly dabarada bellenilip geçilýär.
Aşgabadyň gysgaça taryhyna ýüzlensek, şäheriň düýbi 1881-nji ýylda tutulýar. Şol wagt şäheriň ady 1919-nji ýyla çenli ,,Ashabad” diýlip atlandyrylypdyr. Soňra 1927-nji ýyla çenli şäheriň ady ,,Poltoraskiý” bolupdyr. Şol ýyldan häzirki wagta çenli paýtagtymyz Aşgabat ady bilen tanalypdyr.
Ýurdumyz Garaşsyzlygy alan ilkinji günlerinde bäri uly ösüşlere eýe bolýar. Sanlyja ýylda paýtagtymyzda deňi-taýy bolmadyk ajaýyp binalaryň ençemesiniň gurulmagy ak şäherimiziň dünýäniň döwrebap şäherleriniň birine öwürmek babatda alyp barýan işleriniň netijesidir.
BEGENÇ AŞYROW
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
II ýyl talyby.
