Ýakynda Gazagystan Respublikasynyň Magaryf ministrliginiň «Daryn» ylmy-amaly merkeziniň guramagynda matematika, fizika we informatika dersleri boýunça XXI Halkara Žautykow olimpiadasy geçirildi. Oňa ýurdumyzyň zehinli mekdep okuwçylarynyň 21-si gatnaşyp, üstünlikli çykyş etdiler.
Resmi çeşmelerde habar berlişi ýaly, Astana şäherinde geçirilen halkara ders olimpiadasyna dünýäniň 15 ýurdundan 700-den gowrak okuwçy gatnaşdy. Türkmenistanly okuwçylar takyk dersler boýunça 2 altyn, 4 kümüş we 6 bürünç, umumylykda 12 medal gazandylar. Munuň özi ýaşlaryň bilim almaklary, takyk dersleri hemmetaraplaýyn we çuňňur özleşdirmekleri ugrunda ýurdumyzda edilýän tagallalaryň oňyn netijesidir.
Matematika dersi boýunça geçirilen bäsleşik ýurdumyzyň wekilleri üçin has-da üstünlikli boldy. Mekdep okuwçylarymyz şu ders boýunça 9 medal gazandylar.
Şeýle ýokary üstünlikler türkmen ýaşlaryny täze ýeňişlere ruhlandyryp, munuň özi ýaş nesilleriň halkara ylmy we döredijilik bäsleşiklerine gatnaşyp, zehinlerini açmaklary, ukyp-başarnyklaryny artdyrmaklary üçin ähli zerur şertleriň döredilýändiginiň aýdyň beýanydyr. Ýurdumyzy gülledip ösdürmek babatda ägirt uly işleri amala aşyrýan, ýaş nesle uly ynam bildirip, geljege ak ýol açýan Milli Liderimiziň hem-de Arkadagly Gahryman Serdarymyzyň janlary sag, ömürleri uzak, beýik işleri elmydama rowaç bolsun!
Gandym WELLEKOW,
Türkmenistanyň Magtymguly adyndaky Ýaşlar guramasynyň Lebap welaýatynyň Halaç etrap geňeşiniň guramaçylyk bölüminiň Baş hünärmeni.
