Prezident Serdar Berdimuhamedow XVI BRICS sammitiniň çäklerinde Birleşen Milletler Guramasynyň Baş sekretary Antoniu Guterriş bilen duşuşdy. Döwlet Baştutanymyz ony Birleşen Milletler Guramasynyň güni mynasybetli tüýs ýürekden gutlap, şu gezekki duşuşygyň netijeleriniň däp bolan hyzmatdaşlygy ösdürmäge täze itergi berjekdigine ynam bildirdi.
Netijeli ýagdaýda geçen duşuşygyň dowamynda söhbetdeşler ileri tutulýan ugurlarda özara gatnaşyklary giňeltmegiň mümkinçilikleri barada pikir alyşdylar. Bellenilişi ýaly, Birleşen Milletler Guramasy tarapyndan iki gezek ykrar edilen Bitarap döwlet bolmak bilen, Türkmenistan halkara giňişlikde işjeň syýasaty alyp barýar hem-de bu gurama we onuň ýöriteleşdirilen edaralary bilen uzak ýyllaryň dowamynda netijeli gatnaşyklary saklaýar. Hususan-da, ekologiýa, daşky gurşawy goramak meselelerine uly üns berilýär.
Türkmenistanyň Prezidenti dünýäniň ählumumy meselelerini çözmegiň möhümdigini nygtap, türkmen tarapynyň özara hormat goýmak esasynda ýola goýlan netijeli dialogy hemmetaraplaýyn giňeltmäge taýýardygyny ýene-de bir gezek tassyklady.
