Dünýäniň 30-dan gowrak ýurdundan ýokary derejeli wekiliýetleri, umumylykda 20 müňden gowrak myhmany Kazanda jemlän XVI BRICS sammiti ikitaraplaýyn duşuşyklary geçirmek üçin hem netijeli meýdança öwrüldi. Sammitiň çäginde hormatly Prezidentimiz Serdar Berdimuhamedow Russiýa Federasiýasynyň Tatarystan Respublikasynyň Baştutany Rustam Minnihanow bilen duşuşdy.
Duşuşygyň çäginde Rustam Minnihanow hormatly Prezidentimiz Serdar Berdimuhamedowa Tatarystan Respublikasynyň «Duslyk» ordenini gowşurdy. Döwlet Baştutanymyz bu ýokary döwlet sylagyna Türkmenistan bilen Tatarystan Respublikasynyň, Russiýa Federasiýasynyň beýleki sebitleriniň arasyndaky dostlugy we hyzmatdaşlygy pugtalandyrmakda aýratyn hyzmatlary, ikitaraplaýyn söwda-ykdysady, ylmy-tehniki, durmuş-medeni gatnaşyklary ösdürmäge uly goşandy üçin mynasyp boldy.
Ýeri gelende, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň hem 2017-nji ýylyň sentýabrynda Tatarystan Respublikasynyň «Duslyk» ordeni bilen sylaglanandygyny nygtamak gerek.
«TürkmenGazet».
