Şu günler Russiýa Federasiýasynyň Tatarystan Respublikasy iri ykdysady-diplomatik çäräniň — XVI BRICS sammitiniň geçirilýän ýerine öwrülip, 24-nji oktýabrda sammit «BRICS+» görnüşindäki plenar mejlis bilen dowam etdi. «Kazan Ekspo» halkara sergiler merkezinde geçirilen ýokary derejeli duşuşyga Prezident Serdar Berdimuhamedow hem gatnaşyp, sammitiň gün tertibinde ileri tutulýan ugurlar boýunça Türkmenistan tarapyndan öňe sürülýän başlangyçlardyr alnyp barylýan işler barada çykyş etdi.
XVI BRICS sammitiniň «BRICS+» görnüşindäki mejlisine GDA ýurtlarynyň Baştutanlary, Aziýanyň, Afrikanyň, Ýakyn Gündogaryň, Latyn Amerikasynyň wekiliýet ýolbaşçylary, käbir halkara guramalaryň ýerine ýetiriji edaralarynyň başlyklary gatnaşdylar. Kesgitlenen gün tertibine laýyklykda, duşuşyga gatnaşyjylar durnukly ösüş, garyplygy aradan aýyrmak, howanyň üýtgemeginiň täsirlerine uýgunlaşmak, tehnologiýalardyr bilimleri alyşmak, terrorçylyga, serhetüsti jenaýatçylyga garşy göreşmek ýaly häzirki wagtda dünýä jemgyýetçiligini tolgundyrýan möhüm meseleleri ara alyp maslahatlaşdylar.
«TürkmenGazet».
