23-nji oktýabrda Aşgabatdaky Söwda-senagat edarasynda «Türkmenistanyň nebiti we gazy — 2024» atly XXIX halkara sergi (OGT-2024) öz işine başlady. Bu forumy “Türkmengaz” we “Türkmennebit” döwlet konsernleri, “Türkmengeologiýa” döwlet korporasiýasy Türkmenistanyň Söwda-senagat edarasy bilen bilelikde guraýar.
Maslahata 51 ýurtdan 830-dan gowrak wekil gatnaşýar.
Sergi nebit-gaz, metallurgiýa, himiýa, inženerçilik we energetika pudaklarynda daşary ýurt kompaniýalary üçin özboluşly platforma bolup hyzmat edýär. Oňa gatnaşýanlar diňe bir önümlerini görkezmek bilen çäklenmän, Türkmenistanyň ýangyç-energetika toplumynyň global energiýa ulgamyna goşulmagyna goşant goşýan hyzmatdaşlygy hem giňeldip bilerler.
Sergi bilen ugurdaşlykda halkara maslahat hem geçirilip, ol “Ählumumy energetika bazarynda täze depginler we özara bähbitli hyzmatdaşlygyň geljegi” atly plenar mejlisden we alty sany bölümçeden ybarat bolar.
Sergi öz işini 25-nji oktýabra çenli dowam eder.
«TürkmenGazet».
