«Rbc.ru»-nyň habar bermegine görä, «Inter Maýami» hem-de Argentinanyň milli ýygyndysynyň meşhur hüjümçisi Lionel Messi taryhda iň köp titula eýe bolan futbolçy hökmünde «Marca» neşiri tarapyndan kuboga mynasyp görüldi.
Ýaňy-ýakynda, has takygy, şu ýylyň 17-nji oktýabrynda neşir 37 ýaşyndaky argentinaly hüjümçä onuň futbol meýdançasyndaky üstünliklerini belläp, ýörite baýrak gowşurdy. Bu dabara Fort-Loderdeýlde «Inter Maýami»-niň stadionynda uly dabara bilen geçirildi. Messi baýragyny neşiriň müdiri bolan Huan Ignasio Galýardonyň we amerikan klubunyň egindeş eýesi Horhe Masanyň elinden aldy. Lionel Messi karýerasynda 46 sany topar baýragyny, 56 sany bolsa şahsy baýragy gazanmagy başarypdyr. Onuň hasabynda Olimpiýa altyn medaly, sekiz «Altyn top», dünýä çempiony tituly, şeýle-de Çempionlar ligasynda dört sany ýeňşi hasaba alynýar.
«TürkmenGazet».
