Şu aýyň ahyrynda AFK-nyň Çagyryş ligasynyň duşuşyklaryna gatnaşjak «Arkadag» topary ýakynda duşuşyklarynyň birini möhletinden öň geçirdi. Ýakynda Gökdepe etrabynyň Babarap obasyndaky Sport mekdep-internatynyň futbol meýdançasynda geçirilen duşuşykda topar Balkanabadyň «Nebitçisini» kabul etdi.
Milli çempionatymyzyň 28-nji tapgyrynyň çäklerinde meýilleşdirilen bu duşuşykda «Arkadag» topary garşydaşyndan 5:1 hasabynda üstün çykdy. Şeýlelikde, milli çempionatymyzyň häzirki dowam edýän möwsüminde 25-nji ýeňşini gazanan topar iň ýakyn bäsdeşinden 23 utuk tapawut bilen bassyr ikinji gezek ýurdumyzyň çempiony boldy.
Ýeri gelende bellesek, toparyň çempionlyk ýoly 7-nji mart güni «Altyn asyr» bilen geçirilen we 3:0 hasabynda ýeňiş gazanylan duşuşykdan başlanypdy. Şondan bäri topar tas ähli duşuşyklarynda diýen ýaly, garşydaşlaryny uly hasaplar bilen ýeňdi. Möwsümde garşydaş derwezelere 124 top girizen topar (soňky 31 ýylyň rekordy) öz derwezesine bary-ýogy 18 top goýberdi.
Döredilen wagtyndan bäri (2023-nji ýyl) hiç bir resmi duşuşykda utulmadyk topar gysga taryhynda milli rekordlaryň birnäçesini täzeledi. Bu çempionlyk topara 2025-2026-njy ýyllaryň möwsüminde yklym ýaryşlaryna gatnaşmaga mümkinçilik berer.
«TürkmenGazet».
